急凍Gadgets升呢！驅走暑氣

古惑破格類

星爺有把「蠱惑的槍」，外形同功能九唔搭八，以下Gadgets同樣估你唔到，仲有多種功能添！

J-Cube冰火棒 瞬間製冷

齋睇樣以為係女士至愛嘅美容瘦臉棒，實情呢支冰火棒具備瞬間製冷功能，啟動後橢圓形的金屬面會產生三段溫度，分別是15至18度、10至13度、5至8度，把它放喺頸部或臉部位置，即能為身體降溫。Model調校到5至8度測試，金屬面瞬間變涼，放在臉上冰敷，比風扇涼好多！它內置5,200mAh電池，充滿電後最長可用到6小時，還能當作充電尿袋使用，說明書仲話佢可以收毛孔，一機多用女士必Like！

冰火棒僅重216g，並只有手掌咁細，攜帶好方便！售價︰$599

以燈號顯示溫度，綠色為15至18度。

冰感值︰＊＊＊＊＊（以5個＊為滿分）

Pen Fan 文青風扇

表面佢係一支原子筆，長15.6cm，以ABS樹脂打造，可以書寫、收起筆頭兼更換筆芯，但裝上5.8cm闊扇葉後，則可搖身一變成小型風扇，方便大家邊扮文青邊乘涼。它以1枚AAA電池驅動，隨筆附送底座，可座枱或掛於衫袋上送風。

冰感值︰＊＊

便攜異能類

迷你風扇講求方便，但製冷能力及續航力有限，以下Gadgets能透過「異能」解決問題。

Magi Cool 水冷送風

天氣熱成咁，風扇吹出來嘅風都變成熱風。Magi Cool機身加入水槽，只要在風扇啟動時手動將水氣泵出，噴霧中的微細水分粒子便會把周遭的熱空氣送走，帶來瞬間清涼效果。扇葉採用軟性物料製造，另配備爬山扣，可扣於衣物、手袋及背包上，隨時輕裝上路。

冰感值︰＊＊＊

太陽能風扇 遇光充電

風扇表面設有太陽能充電板，儲8小時電能提供30~60分鐘使用時間，適合戶外活動使用。太陽能以外，它還可經USB充電，於室內可接駁電腦，走到街上則可接駁尿袋，極具彈性。以10cm距離測定其風速約1.8m/s，擺近臉吹都幾舒服！

冰感值︰＊＊＊

穿戴上身類

流動消暑產品大多係手提式設計，拎得耐都咪話唔攰，若能穿戴上身真係爽到痹！

Coolbit背心 一穿即涼

水冷背心唔係新嘢，但入水後有一定重量，而且水分容易蒸發。呢件Coolbit背心作出改良，衫背設有小口袋擺放冷凍包，之後冰涼感覺會經Coolmax吸水纖維傳至上半身。Model穿上後話上背及腋下涼浸浸，着着吓甚至打埋冷震！而背心有M及L兩個尺碼，男女合用。

冰感值︰＊＊＊＊＊

掛頸風扇 固定送風

透過扇葉高速轉動，將氣流引入再集中向上送風，掛頸時會感到風力源源不絕吹送。體積為11×8×3.3cm，重量只有140g，長時間掛喺頸都唔攰，仲有多色選擇以配襯不同服飾。

冰感值︰＊＊＊

飲品急凍類

大熱天時出外遊玩，梗係要飲番罐冰凍汽水，想保持飲品時刻夠Cool，以下Gadgets幫到你。

D-Cube保溫櫃 5.5L容量

若然各位有駕車的話，呢款D-Cube保温櫃就啱晒，它可經車叉或外置電池供電，提供低至5度、高至60度的保溫能力。咪睇佢Size細細，原來重量有2.9kg，而且容量達5.5L，最多可放6罐罐裝飲品或4支樽裝飲品。

冰感值︰＊＊＊＊＊

急速冷卻器 60秒變凍

只要將汽水與冷卻器內的吸盤連接，再加入小量冰塊，一按掣便會令汽水轉動，藉着冷熱對流令液體最快於60秒降溫至2~5度，十足從雪櫃攞出嚟咁涼透心！惟轉動時會令冰塊溶解，所以轉完一罐就要加冰。

冰感值︰＊＊＊＊

撰文︰陳志滔

攝影︰謝孝祥

模特兒︰Kimi

查詢電話︰3102 2783