薄邊C5 Ultra Dual 1,300萬像素自拍新寵

十個女人，九個自拍，所以自拍神器長賣長有！咁多年嚟坊間有唔少自拍神器面世，而且一部比一部強，最近輪到Sony Mobile出招，新機Xperia C5 Ultra Dual不僅有個薄邊6吋巨芒畀大家取景，仲內置1,300萬像素廣角前後置鏡頭及LED補光燈，加埋美顏及各式好玩功能，女士肯定大愛！

Xperia C5 Ultra Dual售價：$3,298

6吋IPS巨芒

「嘩嘩嘩！」係現場Model和女記者見到C5 Ultra Dual嘅第一個反應，無他，佢嘅機身用上一體成形設計，正背面均有玻璃加持，四周則以鋁合金打造，甚有日系風格。機身顏色除黑、白兩色以外，還具有罕見的閃銀綠色，拎上手極之吸睛。搶眼的還有6吋巨屏，由於兩側幾乎無邊，因此視覺比一般6吋芒闊落，加上IPS技術下可視角度高，放大相片清楚細膩；唯獨顏色稍為偏淡，未必人人Like。

前置鏡頭升呢

新機以自拍作賣點，特別將前置鏡頭提升至1,300萬像素，並加入Exmor RS影像感測器，自拍質素大大提升。與一般手機用現場光自拍不同，此機特設前置LED補光燈，確保低光或背光時都能保持影像清晰。鏡頭還支援22mm超廣角，取景角度達88度，群拍一樣冇難度。女士愛執相，此機配備美顏功能，並具備美白、柔膚、古銅等多種玩法，還可啟動「AR面具」功能，直接把朋友或動物臉孔合成到自拍照，搞笑兼過癮。

Xperia C5 Ultra Dual薄邊設計夠搶眼。

備有白、閃銀綠及黑三色，以閃銀綠最為搶眼！

支援4G雙卡雙待，可插兩張nanoSIM卡。

中港4G雙卡雙待

雖然C5 Ultra Dual定位中階，但硬件都唔差，配備1.7GHz八核心處理器及2GB RAM，操作流暢之餘，對焦亦見爽快，《AnTuTu》測出46,118高分，表現中上。型號有個「Dual」字，自然可插兩張SIM卡，新機兼容TD-LTE及FDD-LTE中港兩地4G制式，北上旅遊探親唔使換機。續航力方面，此機的電池容量達2,930mAh，足夠播放7小時47分鐘視頻，而且Stamina省電模式可於熄芒時暫停背景程式，延長待機時間。

前置1,300萬像素鏡頭及LED補光燈，質素與主鏡頭同級。	「單手操作」Mode可把畫面縮至4吋或5吋，方便手細人士篤芒。	Stamina模式在熄芒時暫停背景程式，減低耗電量。
「AR面具」結合動物臉孔及自拍照，效果爆趣！	美顏模式當然唔少得，仲有美白、柔膚、古銅等多種玩法。	另有「AR趣拍」功能，可將虛擬物件加入實景，過癮！
試相區室內自拍時鏡頭夠Wide，閃燈柔和，Model膚色自然。