電訊商搶閘！ 流動付款Phone潮
現時出街消費主要用現金、信用卡或八達通付款，但自從Apple及Samsung先後發布流動付款服務，Mobile Payment已成為消費新潮流。當兩廠嘅服務未殺入香港之時，本地電訊商HKT、SmarTone搶閘推出流動付款服務畀大家Warm Up一下，用手機喺收銀感應器一拍即可完成交易，以後銀包仲使帶乜卡物卡？
Tap & Go 換SIM即用
流動付款講咗咁多年，但實際喺香港用到嘅服務，要數HKT剛發布嘅Tap & Go（拍住賞）。操作原理其實類似早前推出嘅八達通SIM卡，即係利用SIM卡內嘅智能晶片，當手機一拍讀卡器即可透過NFC技術，以《Tap & Go》電子錢包App進行付款。商戶只要有MasterCard的PayPass服務就用到此功能，官方表示現時全港有超過6,000間商戶，包括Circle K、7-Eleven、UNIQLO、Pacific Coffee等都用得到。
預付形式事先增值
用家想玩Tap & Go，首要檢查手機是否支援，現時大熱嘅Samsung Galaxy S6 edge、LG G4都可兼容，之後HKT客戶可到門市免費換張SIM卡並啟動此服務。要留意係它採用預付形式，用家要為帳戶以現金或指定信用卡先增值方可使用，每項交易限$1,000以內，開啟電子錢包時可設定密碼，而每次交易均有SMS通知，以提升安全程度。
小記喺零售店測試購物時，可能服務推出時間較短，同店員講Tap & Go埋單佢哋會有點愕然，但由於用法與PayPass相同，以手機輕拍讀卡機後幾秒便可出單；最正係服務支援Always-On功能，唔使事先着芒開App都照樣能完成付款，使用體驗唔錯。
網址：www.tapngo.com.hk
專家有Say
HKT Payment Limited產品開發、業務發展及卡務營運高級副總裁管紀東（Alex）指出：「SIM卡依家好似一間屋，可分成不同房間，例如八達通、Tap & Go等，喺不同讀卡器會自動開啟相應功能，唔會令資料出現傳送錯誤。」
KISS超聲波新平台
SmarTone亦有推出類似的KISS服務，不過電訊商講到明唔係流動付款咁簡單，而係一個市場推廣及銷售平台。先勿論性質，想用到KISS的話，商戶必須將POS（Point of Sale）系統連接至KISS終端機。交易時，用家利用指定智能手機開啟《KISS》程式，揀選「付費」後將手機一拍感應器便完成。由於付款過程用上超聲波技術，所以iPhone、Android手機都兼容得到！而每次進入KISS Wallet介面，都必須以指紋Touch ID或PIN碼解鎖，最重要是任何網絡商的用戶都可使用。用家可選擇透過Visa、MasterCard為帳戶增值，分為$300、$500或$1,000三個金額，亦可將銀聯卡連結KISS帳戶消費。對於商戶嚟講則可經《KISS》程式進行宣傳，例如發送優惠訊息、提供獎賞等，雖然服務尚未推出，但電訊商表示商戶將提供1%至15%折扣，幾有吸引力。
網址：www.kissco.com
專家有Say
數碼通CEO黎大鈞表示，KISS平台無論Android抑或iOS系統都啱用，就算唔係SmarTone用戶，甚至在冇SIM卡情況下，只要上到網就用得到，兼容度比其他系統高。商戶仲可隨時更新《KISS》程式嘅內容，配合KISS Dollar折扣，手機一拍即可做到Pay、Redeem及Reward功能。
同場加映：手機大廠 潛力無限
香港呢邊由電訊商搶先主導流動付款市場，全球發展方向又點呢？其實Apple早於上年10月已喺美國開放Apple Pay服務，上個月亦正式在英國推出，全美已有22萬間商舖支援此服務，連網購都用得到。用家可將信用卡嘅資料輸入Passbook，以手機喺讀卡機一拍，再用Touch ID指紋認證便完成付款，單憑果粉嘅支持，足以令Apple Pay紅起來！
而Samsung Pay雖然未有推出日期，但它不僅支援NFC技術，同時兼容MST（Magnetic Stripe Transmission）技術，讓用家可將磁卡資料轉移至Samsung Pay，並無線傳送至商戶讀卡器。現時全球有約90%、超過3,000萬個POS系統都兼容到磁卡，好多舖頭毋須更新硬件就用到，潛力不容忽視。
專家有Say
香港資訊科技商會榮譽會長方保僑表示：「Apple Pay其實遲早會嚟到香港，依家電訊商嘅動作，主要讓用家預早習慣新付款模式。而流動付款始終與電子商貿有關，所以愈早入場愈有着數。電訊商可將服務與SIM卡連接並進行保安認證，起碼安全過用傳統磁卡。」
撰文：林子聰
部分攝影：郭凱敏、胡振文
模特兒：Ayavi（Zmodel）