5.2吋Honor 7指紋密令

依家唔少旗艦手機都加入指紋辨識功能，但大多只用嚟上鎖和解鎖。Huawei新機Honor 7利用指紋辨識器加強保安之餘，竟然可長按接聽電話，甚至充當影相快門鍵及開關通知欄，一物多用，確實有諗頭！

榮耀新機水貨抵港

Huawei作為國產手機大廠，Honor喺內地稱為「榮耀」系列，向來以抵玩見稱，正因為定價較低，以往呢個系列多用上塑膠機殼，手感自然差一截。Honor 7卻改玩一體成形金屬機身，質感全面提升。今次水貨抵港嘅灰色版，金屬表面備有漸變效果，惟機背的2,000萬像素鏡頭稍為凸起，平放時要小心鏡頭被刮花。

指紋辨識功能多

新機最大賣點係鏡頭下方嘅指紋辨識器，用家毋須大力按壓或掃動手指，輕按即可完成認證，小記試玩時發覺指紋註冊過程簡單，而且反應靈敏，就算處於屏幕關閉狀態，手指一觸即可着機兼解鎖。另可將應用程式鎖定，或者將相片、音樂、影片等檔案放入「保險櫃」，必須以指紋認證方可解封，萬一唔見咗手機都唔怕私密內容外洩！除咗保安功能，指紋辨識器仲可變成快捷鍵，如長按接聽電話、停止響鬧等，亦可滑動指紋辨識器來開關通知欄，輕按兩次更可清除所有通知。

前置鏡頭設有補光燈，可調校亮度作自拍之用。

採用一體式卡槽，可同時擺放microSIM卡及nanoSIM卡。

「智能鍵」位於機身左邊，可設定按一下、兩下或長按落指令。

支援中港4G網絡

國產手機一向版本多多，今次水貨到港嘅Honor 7「雙4G版」，兼容TD-LTE、FDD-LTE、TD-SCDMA、WCDMA及GSM制式，即係中港2G、3G、4G網絡都用到。要扣分嘅係新機僅支援1800MHz頻譜，未能接收香港部分4G，上網速度可能受影響。硬件方面則屬旗艦級，5.2吋全高清屏幕、HiSilicon Kirin 935八核心處理器加上3GB RAM，整體操作流暢。不得不提是機身左邊特設「智能鍵」，用家可設定按一下、兩下或長按落指令，例如開啟相機、電筒、指定程式或HiVoice語音控制，相當方便！

機身厚8.5mm，以國產機來說算是不俗。	指紋辨識器反應靈敏，手指輕微傾側都認證到。	最多可註冊5組指紋，將指頭反覆在辨識器按壓即可。
備有智能管理功能，提供天氣、手機用量等不同提示。	拍攝介面似足iOS，一掃即可從美顏、光繪畫攝影等模式切換。	內置《健康》App，可計算步行、跑步、單車的距離、速度及消耗卡路里量等。
支援雙卡雙待功能，可選擇撥號、數據等設定。	試相區以5級美顏自拍，整體效果自然，成功將人臉變得白滑。