4大VoIP Apps通話質素 人氣揭盅

«Facebook Messenger»一按通話

通話雙方安裝咗《Facebook Messenger》後，App內嘅Profile Picture右下角便會出現藍色Messenger圖示，而介面右上角備有獨立通話鍵，一按即可打電話。

«WeChat»內地用家最Buy

以Voice Message功能為人熟悉嘅《WeChat》，內地用家極多，喺程式內揀選朋友後，需要按右下角「+」號，再按「語音通話」方可通訊，比其他Apps多一重步驟。

《Facebook Messenger》通話時可隨時轉換成視像通話。	《WeChat》介面不設語音通話按鍵，撥號需要先按右下方的「+」號。	《WhatsApp》於Android加入通話一欄，接電話時會顯示大圖示。

«WhatsApp»打通iOS及Android

《WhatsApp》早前開通埋iOS語音通話功能，引起頗大回響，用家於對話視窗的頂欄會發現一個通話圖示；Android版本更為通話另闢一欄，通話紀錄一目了然。

Skype可隨時切換至視像通話，操作直接簡便。	「Skype又幾好聲喎！」（設計對白）	《Facebook Messenger》每次通話後，可對通話質素評分。

«Skype»VoIP老大哥

以VoIP服務起家的《Skype》，功能和介面不斷更新，最新版只要揀啱朋友一按即可通話；唯一不便係需要通話雙方都處於上線狀態，才可致電成功。

《WeChat》支援桌面版，讓用家透過電腦通話。	《WhatsApp》提供網絡使用流量作參考，記錄通話數據。	《Skype》嘅增值功能較多，如可付費租用號碼。

第一回合：通話鬥清晰：Skype Win

傾電話首要講質素，除了接收要穩定外，音色清唔清、會否Delay等亦相當重要。小記分別以4G及3G網絡，在新界偏遠地區如大埔工業邨等測試4款Apps，當中《Facebook Messenger》通話時有輕微窒機，人聲亦未夠清晰。《WeChat》通話流暢，不過背景雜音較多，而且音量偏低，需要將音量調校至最高方聽得清楚。《WhatsApp》通話音量適中，但雜音明顯較大。而《Skype》人聲最為清晰，背景雜音等都表現不俗，不過就最受網絡速度影響，訊號不穩定時甚至會斷線。

香港資訊科技商會榮譽會長 方保僑	旅遊及科技Blogger石先生	攝影達人Will Cho

第二回合：流量慳數據：WhatsApp Win

至於流量方面，小記以通話2分鐘計算，《Facebook Messenger》錄得898KB，《Skype》消耗1MB，《WeChat》則用上971KB，三者數據流量相若，而《WhatsApp》所用數據僅得387KB，為4隻Apps之中最少，對於流動數據Data Plan有限，或者使用「限速」SIM卡嘅用家就最啱。其他功能方面，《Skype》、《WeChat》都支援桌面版。而《Facebook Messenger》及《WhatsApp》則提供網頁版，最大分別是桌面版可於電腦照樣使用語音通話，而網頁版在電腦使用時僅兼容訊息而冇得傾電話。

第三回合：專家使用心得

香港資訊科技商會榮譽會長 方保僑：「Skype飛線功能齊全！」：Skype Win

「我經常去外地公幹，早年主要用長途電話打返香港，之後試過用IDD回撥，雖然費用較低，但經常撥號失敗。近年轉用VoIP Apps，當中最常使用係《Skype》，因為佢嘅功能較其他Apps齊全，最重要係提供可租用號碼，一到外地即可將香港號碼飛線到此號碼，令通話費用大減。加上世界各地嘅流動網絡愈趨穩定，除了日本、韓國等國家外，早前於北京網絡通話效果都滿意。」

旅遊及科技Blogger石先生：「Facebook Messenger多朋友用！」：Facebook Messenger Win

「個人比較多用《Facebook Messenger》同《WhatsApp》，因為身邊嘅朋友多數已安裝了這兩個軟件，相反《Skype》、《WeChat》唔係每個人都有帳戶。VoIP Apps的發展對經常去旅行嘅我有好大幫助，例如去到機場可用當地Wi-Fi，一落機立刻報平安。如果要推介的話，《Facebook Messenger》的通話質素都幾穩定。」

攝影達人Will Cho：「WhatsApp Call好方便！」：WhatsApp Win

「我自己經常外遊，亦有家人在台灣，所以經常會用VoIP Apps。自從《WhatsApp》有咗語音通話，就用多咗好多，我覺得通話質素同傳統電話相差唔大。有時身處一啲訊號比較差嘅地區，或者網絡冇咁發達嘅國家好似老撾、尼泊爾等，通話時可能會Delay或窒。始終香港嘅朋友平時多數用《WhatsApp》，按一個掣就Call到，唔使轉App好方便。」

總結：《Skype》及《WhatsApp》大熱跑出

經過小記測試同專家評價後，其實4大VoIP Apps各有優劣之處，當中以《Skype》通話質素和附加功能最強，但要撥接雙方都齊齊上線就比較麻煩。而最方便要數《WhatsApp》，皆因香港人十個有九個都玩WhatsApp，隨時都可以一按通話。至於實際通話情況其實不能一概而論，全因VoIP Apps極受網絡影響，不同網絡商、用家身處位置、訊號覆蓋強弱等，對通話質素都有影響，建議大家於Wi-Fi或者4G網絡下使用最穩陣！

VoIP知多啲

現時常聽見的網絡電話、寬頻電話等，均用上VoIP語音通話技術，觀其全寫Voice over IP，已可知它是將語音訊號數碼化，經過壓縮編碼、網絡傳送等處理，還原成聲音讓對方聽到，而目前常用的通訊協定為H.323、SIP等。

撰文：林子聰

部分攝影：郭凱敏