何志恩單打獨鬥時裝路

在香港做時裝不易，要在香港開時裝店更難，名氣如何志恩（Johanna）也要叫苦，就知道難的定義。香港租金出名貴，Johanna也不敢輕言開舖，直至2012年Johanna被邀在尖沙咀某商場開舖，並以免租金作餌，令從未在港開舖的她也為之心動，不過，最後她形容這次合作以不愉快收場，令她不開心，由於Johanna已儲到一批忠實粉絲，她亦相信可以把實物試上身，比在網上單憑圖片去買衫要強百倍，加上當時Johanna經常與陳奕迅、徐濠縈及莫文蔚的名字連在一起，似圈中人多過設計師，於是她更感有開舖的必要性，最終她在中環另覓新店：「我開呢間舖，就係想證明畀大家睇，我係設計師，我係有自己實力。」

拒絕轉嫁消費者

不過，就算再有名氣，沒有大財團支撐下，要獨力經營並非易事，中環地段的千三呎地舖，月租十多萬元，兩年死約後，今年約滿業主要求加租20%，Johanna直言有財政壓力：「依家係一個關口，每個月嘅生意額都做得好好，但香港交租真係好貴，面對交叉點，究竟繼唔繼續好，朋友話做得好就唔好停，而且花咗咁多錢去裝修，但真係好辛苦，每個月搵番嚟就係交租。叫業主減租，佢覺得你唔租大把人租，就算係旺角一個商場，二百幾呎舖仔，都要月租5萬5，你話點做。」雖然Johanna經常被老公力勸要將服裝售價上調，但要她將加租壓力轉嫁消費者，她做不到：「我會知道件衫嘅成本價係幾錢，你要我mark up十倍，咁係好無良，我過唔到自己嗰關。」除了租金問題，大陸工廠工資上漲及年輕一輩不願做廠，也令時裝生意愈做愈難。

陳奕迅年前舉行演唱會，由何志恩為他設計歌衫。	何志恩去年中環店開幕（右二）時，丈夫打本雄輝（右）出席支持，而陳奕迅、徐濠縈則擔任剪綵嘉賓。	每一位設計師都有理想，何志恩也不例外。

指政府資源錯配

成本上漲是大氣候，亦是改變不了的現實問題，但缺乏支援才令Johanna倍覺氣餒，雖然之前政府在施政報告中指會撥款逾億元去發展時裝業，但Johanna對此不以為然，她不吐不快地說：「政府每年真係花咗好大筆錢去做本地時裝騷宣傳，但好多資源係錯配，好似上年叫我開騷，完咗騷乜嘢下文都冇。傳媒同買家係最重要，但兩樣嘢都安排欠奉，做騷當日有個意大利《Vogue》雜誌嘅編輯嚟咗，但竟然冇安排座位畀佢，佢嬲得滯走咗。至於買家，其實係有足夠嘅錢請外國買家過嚟睇騷，但個規矩係一間公司只能請一個人，對方有個隨團翻譯，都話唔可以通融。啲買家嚟咗香港三日，全程冇人照顧，只係臨走要人拍段片，講畀人聽幾enjoy香港。咁樣點可以吸引到買家嚟香港？」政府也罷，連本地傳媒與廠家也令Johanna洩氣：「香港有幾多真正時裝編輯，大部分只會報道外國時裝，香港嘅只係出得一格仔。好多新進設計師，初初創業唔會生產幾百件貨，只係做二、三十件，邊有廠肯睬你。」

何志恩表示現時有幾個計劃在手。	中環店舖設計簡潔，是Johanna的心血之一。	放大圖片

不少計劃醞釀中

Johanna滿口牢騷，只因愛之深，恨之切，她稱對香港時裝業前景確實感到心灰意冷：「好多人叫我去做講座，我都同人講千祈唔好做設計師，風光只係一時，唔會搵到錢。」那麼究竟何去何從？Johanna稱有想過把時裝店關門大吉，因為硬碰硬划不來，現時有不少計劃醞釀中，就看哪邊跑出，她說：「我可能會將自己個系列濃縮啲，做得精啲，當你有咗間舖之後，好多嘢就變咗為做舖而做，你開得舖就要不斷有新嘢出，有時會夾硬要做啲嘢出嚟，係咪值得去做，或者係咪應該停一停呢！」留守需要勇氣，放棄何嘗不是？在人生旅途上從來沒有標準答案，重要的是那份心，身遠心莫離。

黃皮黃心

Johanna對香港始終有份情意結，自13歲到英國讀書，但一直都是黃皮黃心：「我公公好重視中國人身份，我臨去英國讀書時公公同我講：『你可以去英國讀書，但你要記住你永遠都係一個中國人，返到嚟香港要識講識寫識睇中文。』我每個月要寄一封中文信畀公公，佢就會用紅筆圈番啲錯字寄番畀我，要我改正。」

採訪：陳嘉敏

攝影：秦健輝