旅人時光：凌晨機救星
體力與精神是會隨着年齡的增長而遞減，人大了發覺到無論工作或玩樂到通頂，就算瞓番幾多都補償不到。至少，當每次坐完凌晨機後，我便彷彿只剩下一個沉重的軀殼而已。
凌晨機過後往往體力不支。
有次跟兩位好友同遊東京，由於工作關係，坐凌晨機似乎是當時的唯一選擇。兩位仁兄都同屬活力無限的活躍症BB，平常見面已經從沒一刻可以停下來，不過事情總有例外。
那次到埗後，清晨7時到達新宿，到酒店放下行裝，7時半找了家Cafe吃個早餐，便須等到10時才能逛公司，這兩個多小時的光陰簡直如兩年半般漫長，見光死但又硬要沒事做地撐着乾等，嘢已食完，話已說完，天已聊完，卻未等完，於公眾地方睡覺似乎失儀又失禮。硬撐到底，9點9跑到伊勢丹前等待營業時刻，並說好中午12時相約大門前，兩小時的逛街時間讓大家回復精神。
下午12時再度重遇，朋友B問我和朋友A去了哪裏？我答：「我和A上了天台庭園的僻靜處小睡，補眠兩粒鐘。」然而，始終有遊人路過，所以都不能太過熟睡，只是急叉一下電罷了。我見朋友B突然精神煥發但又不見他購物，於是問他所為何以？「10點我即刻衝上最上層個男廁，走入最入的廁格蓋上廁板坐低狂瞓，啱啱先瞓醒。」我們驚訝：「吓？咁都得？」
「男廁排隊機會有限，霸住兩個鐘好過我行行吓暈低。」朋友，你又有你的道理，不過做廁霸又好像有點兒那個啊！
網址：www.facebook.com/maylampage/