小蟻Vs山狗國產平Cam之戰

小蟻運動相機 水路攻港

小米唔只出手機、盒子同外置電池，近日連Action Cam都玩埋。它以小蟻命名，機身上的「Yi」字就係「蟻」嘅普通話讀法。講真，佢嘅硬件規格都幾吸引，用上1,600萬像素Sony CMOS，而且普通版標價只係399元人民幣。不過呢個只係建議零售價，由於香港仲未有行貨，捱炒價在所難免，好似剛到港嘅水貨就貴咗二百幾蚊，可說「早買早享受，遲買慳幾舊」。場內老友提醒機Gor，小蟻機身冇芒，要靠聽聲、睇燈去辨認操作狀態，又未出iOS版App，只得Android手機可連結。

規格表

感光元件：1,600萬像素Exmor R BSI CMOS　

鏡頭：155度廣角

儲存媒體：microSD　

體積：60.4×42×21.2mm

重量：72g

山狗第4代Sports Cam 平價玩芒

論資排輩，山狗係國產Action Cam嘅大哥。其Sports Cam已發展了多代型號，好似山狗第4代SJ4000，既植入1.5吋屏幕，又有7款顏色任揀，機Gor就問老友借咗部黃色機仔玩吓。對手小蟻嘅機殼設有底座位，但山狗第4代就冇，一切玩法都要加配件，好在佢嘅產品線發展成熟，唔只得透明防水殼，仲有好多配件可用。場內老友話山狗一直多人用，皆因其性價比高，就算運動或旅行時Total Lost都唔會心痛；而且有個芒喺機背，影相拍片都方便好多。

小蟻採用可拆式電池設計，可更換後備電池。	入卡位設於機背，附有蓋掩遮住入卡位及端子。	山狗 售價：$450起

規格表

感光元件：1,200萬像素CMOS

鏡頭：140度廣角

儲存媒體：microSD

體積：59.3×29.3×41.1mm

重量：44g

第1回合：鬥操作穩定：山狗Win

Action Cam嘅Size咁的骰，機身按鍵自然慳得就慳，好似小蟻真係想搵多粒掣都冇，加上佢係初代產品，系統和軟件配套未算完備，如機身亮起紅燈時（拍片模式），喺戶外陽光底下幾乎睇唔到；開關鍵嘅顏色LED燈雖然靚，但機Gor每當貼住玻璃拍片時，LED燈嘅反光便會入晒鏡。最煩係機內嘅Wi-Fi好唔穩定，有時同手機連連吓線會斷咗，又要重頭開機Setup。雖然山狗第4代嘅按鍵亦唔多，但有個芒仔顯示操作狀態，兼可用來取景及翻看相片，Wi-Fi連接時又穩定好多，抵讚！

山狗配備1.5吋屏幕，方便睇番拍攝效果。	插卡位設於機側，但沒有蓋掩保護。	小蟻軟件配套較弱，用Wi-Fi連接手機時不時斷線。

第2回合：鬥周邊配套：山狗Win

玩Action Cam有兩類人，一係經常旅遊Hea玩，一係鍾意尋求刺激運動，這亦係小蟻同山狗嘅定位分野。小蟻比較適合Hea玩，唔使加配件都可直接裝到自拍神棍同腳架，邊行邊拍夠方便。山狗嘅配套較多，由防水殼到單車固定架統統都有，擴充性較強。最初有傳聞話小蟻會用到GoPro配件，但機Gor見到兩機尺寸同按鈕擺位不盡相同，加上廠方現時未推出小蟻專用配件，擴充性始終差啲。

山狗連接手機操控相當穩定，介面亦算易用。	小蟻另有旅遊版（售價：$780），只係跟多一支自拍神棍。	山狗跟機配件較多，包括防水殼及單車固定架。

第3回合：鬥影像質素：小蟻Win

機Gor今次帶咗小蟻同山狗到日本影櫻花，齋睇相和片已發覺兩機畫質有好大分別。拍攝範圍方面，小蟻鏡頭有155度廣角，影像變形帶有魚眼效果；山狗就比較正常，但只有140度廣角左右。其次是山狗的色彩飽和度太高，顏色過分鮮明，令原本偏白嘅櫻花變成極度粉紅；而小蟻色彩雖然略淡，但較為忠於真實。再放大影像的話，更會明顯發現山狗成像邊緣有些少模糊。

達人教路：網站創辦人及科技專欄作家Ray：「鏡頭要夠Wide！」

「揀平價Action Cam，首要睇吓鏡頭夠唔夠Wide，現時好多機款已能做到。如經常玩戶外運動或水上活動的話，防水殼更是必需品，小蟻最大問題是未有專用防水殼，這方面較蝕底；但它用上與GoPro同級的Ambarella Chipset，畫質有保證。」

機Gor Report：小蟻講質素 山狗贏配套

機Gor帶咗兩機去日本玩幾天，拍吓櫻花之餘又試過影夜景，發覺兩機嘅夜景表現都係麻麻。不過Action Cam始終係用嚟拍嘢，機Gor覺得影像質素較為重要，呢方面小蟻會贏出半個身位，皆因佢放大影像都唔會起狗牙，色水又唔會太假。但如果鍾意玩戶外運動，山狗就真係冇得輸，皆因佢有齊防水配件和固定架，仲可以望住機背芒仔睇吓拍成點，配套取回不少分數。

Profile

機Gor

機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢電話：6997 0808