群拍神器Usie慶團年
年三十晚食團年飯嘅日子，姨媽姑姐叔伯兄弟聚首一堂，除了例牌問幾時結婚生仔等問題外，世紀大合照亦在所難免。想氹家人開心，今天Selfie（自拍）請行埋一邊，取而代之係Usie（群拍）。以下為大家介紹一系列群拍神器及應用技巧，一機在手，保證各位可以喺親戚面前威盡羊年！
道具篇：「神框」變身 笑足全場
仲用自拍神棍咁Out？近日自拍神「框」都出咗啦！呢款由ahha推出嘅Selfie Snapshot Case適用於iPhone 6，一經套上不但可保護手機及變成座枱支架，最厲害係外框可整個翻出來變成把手，網絡紅人Miss Hunny試過後表示︰「呢個框用嗰陣可延長取景距離，唔用時又可收埋喺機殼，唔似得自拍神棍阻住人哋，而且一定冇食肆或地方禁用，親戚肯定冇投訴！」值得一讚是它可配合手機程式《ahha emoji》使用，只要對住手機講聲「ahha!」即可拍攝，影完之後仲可任意加入不同濾鏡同表情符號，大人小朋友齊齊嗌齊齊玩，保證笑足全場！
廣角補光配件 強化手機
若閣下嘅屋企係大家族，一般手機鏡頭唔夠Wide的話，不妨試試本地Muku Labs出品的Macrowide廣角鏡頭。它兼容市面大部分手機型號，毋須安裝任何應用程式，其雙塗層光學玻璃鏡片即可強化手機鏡頭的廣角拍攝能力，最多支援140度廣角，親朋好友自拍完全冇難度。此外，外出用餐嘅環境大多昏暗，奈何手機內置閃燈嘅補光能力麻麻，這時可使用另一神器Knog [expose] smart，它是一個備有9顆LED的外置補光燈，光線特強，仲可透過App控制光線強弱、白平衡及曝光時間，最長可使用70分鐘，玩埋拍片都掂喎。
手機篇：Blade S6連拍揀到啱
縱有配件幫手，若手機本身影相質素唔得，一樣神仙難救！以下為大家推介專為群拍而設的智能手機。第一部是剛在港推出的ZTE Blade S6，前後置鏡頭分別達到500萬像素及1,300萬像素，配合群拍功能，一按快門即會連拍多張相片，事後再讓用家慢慢挑選最佳表情，就算有親戚眨咗眼都唔使再影。另備有超強美顏功能，除了美肌美白等例牌嘢外，仲可以美瞳、瘦臉、收鼻翼、改變唇形甚至加入星星眼，幫姨媽姑姐執到靚一靚！
GALAXY A5超廣角合照
另一推介的是Samsung GALAXY A5，此機前置鏡頭達500萬像素，並支援106度廣角拍攝，比一般手機80度左右的前置鏡頭Wide得多，打橫拍攝連背景都影埋，抵讚！值得一提，它還提供Selfie Alarm自拍提示功能，用家可先在屏幕設定臉部拍攝位置，當手機偵測到臉部符合相關位置，即會發出提示聲並同時拍攝，好等大家不會因人擠而被擋着臉孔。
相機篇：群拍新機影全家福
雖然手機自拍夠方便，又有神棍又有自拍框，但講到質素始終都係相機高少少，為了方便用家群拍，不少相機都紛紛加入反芒設計，如Olympus PEN E-PL7的3吋屏幕能夠向下翻揭，建議配埋廣角鏡頭，勝在視角夠闊能夠影晒成家人。
App輔助遙控
現時唔少相機都加入Wi-Fi功能，正如「自拍神器」Casio EXILIM TR50不僅適合自拍，只要利用手機配對，再加埋手機App便可遙控拍攝，而且可睇住畫面取景，群拍手到拿來。再加上TR50提供擺姿勢拍攝功能，會自動連拍5張，而且每張相之間都有3秒時間倒數，畀大家有足夠時間擺姿勢，要玩出唔同表情和動作話咁易。
查詢電話︰
（a）3619 6500
（b）2950 0348
（c）2553 1151
（d）3759 0622
（e）3698 4698
（f）2376 2150
（g）2926 2300
撰文︰陳志滔、黎子豪
部分攝影︰張群生