Moverio BT-200 320吋投影超體驗

88g輕身減磅

其實Epson早年推出過Moverio BT-100智能眼鏡，廠方稱之為Wearable Display，不過其外形笨重，令到市場不太受落。廠商遂於BT-200 Smart Glasses將設計大幅改良，修身後變得更Slim，體積只比普通3D眼鏡大少少，最重要係重量只有88g，小記試戴咗大半天，鼻樑和耳仔位都幾舒服，整體感覺唔錯。值得一提，新機嘅功能更齊備，好似鏡片前方加設一組鏡頭，方便用家隨時隨地拍攝，可惜佢嘅畫質只屬一般，僅支援640×480解像度。而眼鏡會連接住一個Touchpad操控裝置，線身特別加入線控設計，可插上耳機聽歌睇片，聲畫俱備。

左右鏡玩3D

講番智能眼鏡嘅投影功能，其左右鏡片組分別設有0.42吋960×540解像度屏幕，用家更可將2D畫面，利用左右鏡虛擬出3D立體效果。較特別是畫面尺寸會隨着觀賞距離而改變，5米距離下畫面尺寸約有80吋，當距離移至20米時，畫面可放大到320吋，顯示效果震撼！小記試玩時發現透明開放式鏡片設計有利亦有弊，雖然用家可睇到外來景物，但要兼顧鏡內的投影畫面及街外實景，長時間睇片雙眼都幾攰，建議用家玩嘅時候唔好成日分心四圍望。而睇片時望住深色嘅背景，顯示效果會較佳，畫面層次更加分明。

兩邊鏡片內均設有0.42吋屏幕，亮度可自行調校，顯示清晰。

BT-200重量大幅減磅至88g，另附有鏡片框，用家可自行拎去配近視鏡片。

植入Android系統

想操控Smart Glasses各項功能，就要靠跟機嘅Touchpad操控裝置，它連接着眼鏡側框，內置TI OMAP 1.2GHz雙核心處理器、1GB RAM及8GB內存，仲植入Android 4.0作業系統，配合機面嘅主頁、返回、功能3個實體鍵，以及約3.5吋嘅Touchpad觸控板，即可操控眼鏡睇相、播片、上網等。今次產品採用Stock Android介面，內置瀏覽器、圖片庫等基本功能，小記試過經Wi-Fi睇《on.cc東網》和YouTube串流短片都好正。可惜它不設Google Play，用家只能以廠商自家《MOVERIO Apps Market》下載Apps，暫時數量只有十幾隻，如《樂天Kobo》電子書、《Yahoo！Browser》瀏覽器等，而小記試過直接安裝apk程式，但唔少都出現彈Apps或不兼容情況，希望稍後有所改善啦！

眼鏡前方設有一組鏡頭，可惜拍攝質素一般。	Touchpad操控裝置採用專屬插頭來連接BT-200。	透過Touchpad可操控眼鏡畫面的Cursor，進行放大縮小等。

BT-200AV影像傳輸器

跟機附送BT-200AV影像傳輸器，透過HDMI可接駁Blu-ray播放器、Android Box等裝置。傳輸器會經Wi-Fi將影像串流至智能眼鏡播放。另可透過Miracast連接對應的Android裝置，將影像檔案傳送至Smart Glasses。

BT-200AV影像傳輸器	Touchpad操控裝置備有約3.5吋觸控板及3個實體鍵。	線控設有3.5mm插頭，可連接不同耳機聽歌睇片。
機身可外加microSD記憶卡，將影片、相片放入智能眼鏡觀看。

Smart Glasses同Google Glass之別

唔少人第一眼見到BT-200，都以為佢係抄Google Glass。事實上Google Glass是由鏡頭、咪高峰、屏幕、耳機等硬件組成，所有硬件鑲嵌於眼鏡臂上，其大部分功能均需要透過語音或掃動臂身操控，屏幕會透過卡片形式顯示時間、短訊、相片等內容。而BT-200 Smart Glasses則以多媒體播放及娛樂功能為主。

撰文：林子聰

攝影：陳世昌　

查詢電話：3102 2783

模特兒：Miki