甲一球星實測！94Fifty智好波

手感回彈適中

今時今日做運動，乜都要數據、講分析，從智能手錶出到成行成市已可見一斑，但智能籃球卻是聞所未聞。94Fifty由InfoMotion公司研發，外觀與一般籃球無異，Size是7號波，兼具防水及回彈能力，外層則以真皮製造，故握球時會有「啜手」感覺。中鋒蔡芳裕拎上手後表示︰「開頭以為智能籃球一定好大個，而且好似膠波咁，殊不知手感幾好，射落同真波冇乜分別！」控慣波嘅潘志豪補充︰「佢拍波感覺真實，回彈力適中，係着地聲有點怪，但相信放晒死氣再加番氣便可改善。」

練波事半功倍

有名你叫智能籃球，點智能法先？原來佢內置活動感應器，用家只要透過藍芽跟《94Fifty Basketball》手機App連接，即可解讀球員拍波次數、站立位置、起手速度、空中拋物線及旋轉速度等，然後再將結果傳至擁有數千名球員數據的資料庫內。由於籃球屬於肌肉記憶操控（Muscle Memory）的運動，只要將數據作比對分析，便能讓球員了解自己的優點缺點，猶如多了個私人教練在身旁。有教開波嘅蔡芳裕一語道破此波優點︰「平時教學生射波，叫佢哋射高啲或落多啲旋真係好抽象，但呢個波就可得出以上數據，例如某個位置拋物線要45度先靚，球速要130rpm至150rpm之間才叫好，學生跟住練自然事半功倍！」

94Fifty尺寸同普通籃球一樣，支援防水及無線充電功能。售價：$2,388	射球 記錄每次射波起手速度、拋物線及轉速，每項數值有建議範圍畀你跟住練。	傳球 部分功能需要傳球才能啟動，可以順便練埋傳球準繩度。

同球星鬥數據

打得波預咗要鬥波，94Fifty預載「Head to Head」功能，最多可記錄5名球員數據，然後可進行籃球戰，控衞可鬥Dribble次數、Crossover速度及弱手運球穩定度，射手則可鬥起手速度、罰球弧度及三分球弧度等，玩法多變。特別一提，用戶還可把自身數據上載到facebook或twitter，與其他波友比較，據知目前大部分紀錄皆是由孟菲斯灰熊球星Mike Conley保持，大家想贏佢就要加把勁啦！當然此波並非全無缺點，例如售價二千幾元有點昂貴，若能下調一點會有更多人受惠。

控球 記錄一段時間內的拍球次數，適合球員練習高速運球。	附送無線充電器，將籃球放喺上面即可充電。	另有便攜袋，方便波牛帶住智能籃球出街玩。

蔡芳裕

身高︰6呎6吋

司職︰中鋒

評語：「個波對教導學生球技好有幫助，但係貴咗啲，若然有Discount就好啦！」

潘志豪

身高︰6呎

司識︰控球後衞

評語：「球感唔錯，射同傳都有真波質感，美中不足係記錄唔到入球與否。」

撰文︰陳志滔　

攝影︰胡振文

查詢電話︰3102 2783