36倍超解像 ZR850 荷塘「影」蹤

每年6至8月為荷花花期，係時候帶齊「架生」去捕捉出水芙蓉美態。要拍攝水上荷花，最重要是相機焦距夠長，假如冇重型長炮，又想影得輕鬆的話，Casio新推出的EXILIM EX-ZR850天涯DC肯定幫到手，它內置18倍光學變焦鏡頭，並可透過超解像技術將主體放大至36倍，影荷花特寫一Zoom搞掂。

售價：$2,980

5軸防震系統

香港主要的賞荷勝地，大多有欄杆圍着荷花池，想Close-up影靚相惟有靠長焦距鏡頭。ZR850配備25~450mm變焦鏡頭，配合36倍超解像技術簡直如虎添翼。此技術會連拍多張相片並加以合成，之後再銳化線條，所以它比數碼變焦更能保持畫質。雖則Zoom到咁遠容易導致手震令影像模糊，幸好新機加入5軸防震系統，能修正多方位晃動，配合高速連拍合成便能達至5級防震效果。

間隔拍攝功能

荷花一般由開花至凋謝大約只有3至4天時間，若然想捕捉整個過程，不妨試試新增的間隔拍攝功能，它跟縮時攝影的分別，在於間隔拍攝針對靜態影像而設，而且壓縮時間更長，用家可設定間隔時間由10秒至60分鐘影一張，而拍攝張數可由10張至500張，即係最長可以影到近20天，最啱拍攝繁花盛放呢類主題。新機還支援三連拍、HDR、360度全景攝影等功能，機頂又有HS高速攝影鍵，以便捕捉移動中的景物，玩法多籮籮。

若然想加強拍攝穩定性，將防震設定為「強」即可。

新增間隔拍攝功能，可設定間隔時間最長為60分鐘。

Wi-Fi即拍即Share

若各位有用過上一代ZR800，應發現它不設Wi-Fi功能，過相一定要拔插SD卡，今次ZR850終於引入Wi-Fi功能，用家透過《EXILIM Remote》App即可遙控操作和傳送影像，利用手機遙控拍攝的優點，是確保長時間捕捉荷花美態時，不會造成相機搖晃，而且變焦夠順暢，仲可即時Share上網。此外，新機內置多種濾鏡特效，當中最好玩首推水晶球效果，畫面會有一粒猶如水珠般的東西包圍主體，配合朦朧背景，切合荷花唯美主題。