30倍長炮DC復活節伴旅
下星期就到復活節，喺呢個旅遊旺季，機Gor一早報咗團外遊，爭在未揀啱帶邊部相機啫。講到旅行Snapshot，首選梗係天涯長炮DC，近期有同為30倍變焦嘅Sony Cyber-shot HX60V及Canon PowerShot SX700 HS登場，遠拍近攝一機包辦，究竟邊部適合做機Gor嘅伴「旅」？埋身鬥一鬥自有分曉。
Cyber-shot HX60V 五軸防震
以往30倍Zoom只有長炮Prosumer機款才能做到，Sony去年搶先推出號稱「世界最輕巧30倍光學變焦DC」Cyber-shot HX50V，由於冇乜同級機種競爭，「獨市」之下自然好評如潮。來到後繼新作HX60V，防震系統進一步強化，針對拍片配備智能動態模式及五軸防震，
基本上可全方位捕捉穩定影像，加上引入NFC技術，同手機連線一嘟搞掂。
規格表
感光元件：2,040萬像素Exmor R CMOS
焦距：24~720mm
光圈：F3.5~F6.3
屏幕：3吋92萬像素
感光度：ISO 80~12,800
體積：108.1×63.6×38.3mm
重量：246g
PowerShot SX700 HS創意拍攝
Canon一直Keep住有出長炮DC，新登場嘅PowerShot SX700 HS繼承前作SX280 HS，鏡頭由20倍Zoom升呢至30倍Zoom，為廠方首部支援30倍變焦的輕薄DC。新機的設計變化較多，有針對遠攝對焦的構圖輔助鍵，還迎合潮流加入NFC技術，簡化連線步驟。另植入創意拍攝模式，影1張相可變出6張唔同效果嘅相片，夠晒驚喜。
規格表
感光元件：1,610萬像素CMOS
焦距：25~750mm
光圈：F3.2~F6.9
屏幕：3吋92萬像素
感光度：ISO 100~3,200
體積：112.7×65.8×34.8mm
重量：245g
DC防震系統演變
早期DC所用的防震系統，主要分為鏡頭防震及感光元件位移，為水平和垂直震動進行修正。時至今日，DC大多偏向感光元件位移防震技術，另引入不少新系統，包括改善平移震動的混合式防震，全方位（水平、垂直、旋轉、左右及上下）五軸防震等，而防震級數亦提升至最高5級，令遠攝時影像更穩定。
第1回合：鏡頭鬥實用
單睇牌面，HX60V擁有2,040萬像素，較SX700 HS嘅1,610萬像素贏咗半個身位，雖然有人話旅行Snapshot用唔着咁高像素，但機Gor覺得「Zoom到用時方恨少」，去到名勝景點，當30倍Zoom都唔夠遠時，便可利用高像素去裁切畫面搭救。鏡頭方面，HX60V嘅鏡頭Wide少少，支援24mm廣角，去旅行影風景較啱用；而SX700 HS廣角端為25mm，Zoom盡可以去到750mm，遠攝較着數。最重要係HX60V標榜五軸防震，拍片時的防震能力較強，稍勝一仗。
第2回合：App鬥方便
旅行拍照，梗係想第一時間擺上網博Like，今次兩機都支援Wi-Fi及NFC技術，一嘟機身即可連線。HX60V對應《PlayMemories Mobile》手機App，有得遙控拍攝之餘又可過相，用落都幾方便，最正係遙控拍攝時，手機可同步儲存一張細Size嘅相，以便上傳至社交網絡。而SX700 HS支援《Canon CameraWindow》App，以前淨係可以過相，近期Update咗能玩埋遙控拍攝，機Gor試玩時發覺其同步率相當高，時滯又短，用落較為順手。
第3回合：影相鬥玩味
機Gor向來貪玩，旅行影人影景都想多啲變化，之但係搵勻成部HX60V，好玩嘅地方只得一掃全景模式同埋濾鏡特效，雖然用一掃全景影大範圍環境確係幫到手，但始終欠缺驚喜。講玩味都係SX700 HS較有誠意，當中推介創意拍攝模式，無論自拍、遠攝等情況，影1張相即可變出6種不同效果，而且次次效果都唔一樣，真係估佢唔到。
機Gor Report：Hotshoe擴充添實用
長炮DC嘅變焦倍率愈嚟愈高，機身Size卻愈趨纖薄，啱晒鍾意輕裝上陣嘅機Gor，而今次比併可說不分軒輊，HX60V像素較高，SX700 HS玩味較強。不過吸引到機Gor嘅係HX60V支援Hotshoe設計，可另購閃光燈、收音咪等配件作擴充之用，今趟復活節一於帶埋佢去旅行！
達人教路：旅遊攝影專家Richard Lau：「長炮DC最緊要防震！」
「無論支鏡頭Zoom到幾遠，揀長炮DC最緊要留意防震系統，如果Zoom到最遠時手持拍攝依然Sharp，就代表防震值得信賴，否則Zoom得遠但影唔到靚相，便得物無所用。長炮DC嘅優點係適合拍攝小品，例如影櫻花由樹底影上去樹頂，能以大特寫捕捉花卉，而且長焦距能令景深更為突出。」
機Gor Profile
機不離身，不信Spec只信測試，不扮高深，懶理低俗，貪新不忘舊。
撰文：機Gor
查詢電話：（a）2345 2966、（b）3191 2333