專家教航拍鳥瞰南生圍
最近有貨船喺長洲海面擱淺，成為影友們的新景點，香港團隊HK URBEX甚至帶埋新興「航拍」玩意，遙控DJI Phantom 2 Vision飛行攝錄器，從高空俯瞰呢艘「長洲鐵達尼」，仲整埋條片擺上網博Like。究竟點樣拍出蔚為奇觀嘅空中片段？今次一於請專家教路，深入影友熱點玩「航拍」，感受不一樣的鳥瞰景色。
電視掀起航拍熱潮
航拍又稱為空拍、空中攝影或航空攝影，以前想玩動輒要出動直升機飛上天，依家用Phantom 2 Vision便可遙控拍攝，成本一萬元有找，而且備有1,080p全高清影片質素之餘，仲可拍攝1,400萬像素相片，比租用直升機抵玩得多。DJI香港代理的產品專家Benny指出：「香港之所以興起航拍，其實有賴之前《三個小生去旅行》電視節目，試玩上代DJI Phantom拍攝影片和花絮，令更多人想體驗航拍樂趣。」
從天空飛越山貝河
今次去到南生圍玩Phantom 2 Vision，模特兒用咗10分鐘就掌握到基本操作技巧，遙控器的左邊操控桿用作上升和水平自轉，而右邊操控桿則控制前後左右移動，最正係可以夾住智能手機，透過《DJI Vision》App實時觀看鏡頭畫面，眼見佢飛上天望到成個南生圍景觀，再慢慢橫越山貝河，飛過去對面的元朗工業邨，真係航拍先至做到。不過起飛容易降落難，試玩咗幾次都經常一下子衝落地面，整體感覺似打緊機多啲！
超越範圍自動返航
如果大家諗住Phantom 2 Vision好似遙控飛機咁可以玩花式，就大錯特錯啦！皆因飛行器以穩定和安全為先，Benny解釋：「就算玩緊時完全放手，進入無人駕駛狀態，飛行器都會自動懸浮於空中，確保唔會因失控而炒機。」講到最巴閉嘅地方係內置GPS自動返航功能，它於起飛時當接收到6個衞星或以上訊號（最多10個），如飛到超越300米接收範圍，便會自動返回起飛位置。
垂直修正畫面搖晃
玩得遙控機，都會揀空曠人少嘅地方，但這些地方難免會遇上強風，Benny續道：「若然在無風環境下飛行，飛得高會較有利，事關愈貼近地面，愈容易遇上熱氣流，相反在高空無風帶會比較穩定。即使遇上強風，飛行器的鏡頭會因應機身擺動而進行垂直修正，減輕畫面搖晃；由於做唔到左右修正，所以喺4級風力以上或者有雨環境就唔建議玩。」香港在航空管制下，基本上於機場及航道附近都唔畀玩遙控機，幸好本地仲有不少值得拍攝嘅靚景，Benny除了推薦南生圍外，西貢一帶如大坳門、西沙、萬宜水庫等都適合玩航拍。
「長洲鐵達尼」後製減震
「長洲鐵達尼」短片近日被網友熱捧，拍攝者之一、HK URBEX成員Edwin表示：「當日利用Phantom 2 Vision玩航拍，海上其實都幾大風，而且移動時有少少震，所以我哋透過後製的數碼防震，為畫面進行加工，將四邊少少Crop走，以達至穩定效果。」很多遙控飛行器的續航力都好短，相比之下Phantom 2 Vision較為優勝。「我哋好多個Shot都唔係一Take過，要NG好多次，所以事前準備咗4枚電池，每枚大約可玩到20~25分鐘，加埋都可以拍個幾鐘。」
其他飛行器選擇
市面上不乏用於航拍的遙控飛行器，好似Parrot AR.Drone 2.0支援Wi-Fi遙控影相及攝錄，雖然售價比Phantom 2 Vision平上一截，但其拍片只有720p畫質，而且鏡頭視角得92度，相對冇咁Wide。
航拍小貼士：影景篇：高空Pan鏡
玩得航拍個個都諗住有咁高飛咁高，但Benny話影景唔好飛到最高，皆因景物會變得好細，睇落反而少咗輪廓線條，其實飛到50~60米左右再慢慢Pan鏡已經好靚。
影人篇：Top Shot角度
影人需要飛得好近先睇到個樣，建議先於螺旋槳加裝保護罩，取景時應該於正上方Top Shot拍攝，若果以45度角向下影人，便缺乏航拍俯視的效果。
撰文：黎子豪
部分攝影：張群生
模特兒：Rose（Reborn Production）
查詢電話：（a）3188 0767、（b）2416 6700