靚芒睇星星 Lenovo Vibe Z

韓劇《來自星星的你》掀起全城煲劇潮，不過劇集今個星期就大結局，唔想冇話題就要抓緊時間翻煲再翻煲！Lenovo全新推出的旗艦機王Vibe Z就是為煲劇而生，既支援4G LTE方便用戶上網重溫，其5.5吋芒仲銳利唔反光，陽光底下一樣睇到千頌伊及都敏俊個靚爆樣！

Lenovo Vibe Z 售價︰$4,698

適合戶外煲劇

Lenovo作價29億美元鯨吞Motorola，就知他們有心在手機市場大展拳腳，今次推出的Vibe Z更是他們的Show Off之作。最大賣點當然是5.5吋屏幕，採用先天可視角度高的IPS面板之餘，還提供1,920×1,080解像度及400ppi像素密度，比iPhone 5s的326ppi還要高。試播《星星》所見，近距離觀看字幕，邊緣實淨未見「化開」，而且在陽光底下亮度依然充足，至適合戶外煲劇用。順帶一提，屏幕更可自由調校飽和度、色調及銳利度，想幾利幾暖色全部由自己話事！

自拍控有排玩

戶外煲劇，機身手感都好重要。呢方面Vibe Z承襲前代Vibe X的纖薄設計，厚度僅7.9mm，四邊機框微微彎曲，再加上機背的雷射坑紋有防滑作用，單手操作靈活之餘，仲頗具質感及貴氣。拍攝功能方面，前置鏡頭達500萬像素，並對應84度廣角拍攝，自拍質素比一般智能手機優勝，而機背的1,300萬像素鏡頭更支援F1.8大光圈及BSI感光元件，即使環境昏暗也能拍出高清及不偏色相片。其他「分唇」還包括10張連拍、畫中畫、HDR及全景拍攝等，加埋20款濾鏡效果，自拍控有排玩！

主頁抽走了App Drawer，程式放晒落5.5吋芒上，操作直接就手。

試相
對焦快且準，亮度充足，顏色亦見自然。

隨機附送Smart Cover，並有3款顏色選擇。

頂級硬件規格

坦白講，Vibe Z售價並不低，但收得你如此價錢，硬件規格亦成正比，處理器是Snapdragon 800 2.2GHz四核心架構，既支援4G LTE高速上網，在2GB RAM幫助下，《AnTuTu》跑分還與G2、Note 3等機王看齊！介面方面，雖然行的是Android 4.3系統，但就用上了自家製UI，一如很多國產機般抽走了App Drawer，把所有程式直拉到桌面，用落更直接；同時官方更預載了大量程式，例如節能用的《樂省電》、防毒工具《樂安全》，以及可快速傳檔的《茄子快傳》，比公版多嘢玩得多。