抱石非扮型 徒手攻頂

冇落雨即出動

小記跟隨Da Verm Climbing Club一眾導師與會員，前往大頭洲玩攀岩抱石，可幸當天只刮大風、沒有下雨，因為石頭一濕大多會取消行程。Da Verm本身是一間室內攀石場，但只要天氣許可，老闆阿B便會Call齊會員朋友，出外抱石玩足一天，無論新手或老手都可一齊玩。他表示：「其實比起外國一落雪就冇得玩，香港一年四季都適合抱石。雖然外國好多人興喺戶外玩，不過為安全計，我會建議先喺室內場練習一、兩個月，熟悉晒攀登技巧及安全措施會更好。」

同伴做好確保

Da Verm導師浩揚說，今次玩抱石的地點相對較近，由石澳巴士總站向石灘方向前進，再行到大頭洲崖邊岩石區約需廿多分鐘，如果去荃灣蓮花山、東龍島或港島舊山頂道，路程更遠。別小看這廿多分鐘，幾位會員孭住大型抱石墊趕路，都幾考體力。點解要帶抱石墊去玩？雖說一般攀爬高度只有4、5米，但由於不設繩索輔助，其他同伴便要做好確保（Spot），使攀登者身體墜落時能保持垂直，再加上抱石墊卸力，以減低攀登者墜下時的傷害。

粉袋內有鎂粉，助攀岩者減少手汗，以防跣手。一般150g鎂粉約百多元有交易。

攀石鞋鞋尖設有特製膠面，可「食住」岩石表面。鞋底較平（左）適合初學者，鞋底較彎（右）適合高手。

着重手腳平衡

室內場的地面鋪滿膠墊，即使失手墜下都不太礙事；但在崖邊抱石，爬到半途盡是懸崖，心理壓力較大。以攀爬大頭洲的岩壁為例，已有多條路線選擇，其中一條要靠石隙上手，因而需要側手攀登，看似驚險，其實只是一條V2初中級難度路線（最高難度為V15級）。浩揚指，攀爬最重要是手腳平衡，先穩定手腳位置才做下一步動作，看他只需十來秒便攀上岩頂，非常厲害。香港最難路線為蓮花山的V10級崖壁，攀登時只有一、兩個手指位供上手，超級高手先啱玩！老闆阿B跟導師浩揚均表示，抱石的樂趣來自挑戰自己、攀過困難的成功感，大家又有冇興趣挑戰自己呢？

攀爬時切忌心急，最重要手腳平衡，找到支點穩住。	一人攀爬時，有好多人喺下方做Spot確保安全。	Da Verm老闆阿B說以前因攀石場地較少，令大家難以接觸抱石活動，這兩三年已大有改善。

裝備先決：攀石鞋加粉袋

抱石屬於徒手攀登運動，故所需裝備較少，只要有攀石鞋及粉袋即可。前者可分成兩類，其一是鞋底較平，屬入門級別；另一款鞋底較彎，俗稱「蕉形」，多會選擇較小尺寸，令鞋身更貼腳。而粉袋內的鎂粉主要用來吸收手汗，另一用法是Mark低上手上腳位置，令新手更易掌握攀登路線。「很多人誤會攀岩者除去上衣是為了『騷肌』，其實抱石時，上衣有機會妨礙攀爬動作，反而下身要穿長褲避免刮損雙腳。」

玩家意見 Aaron（5年攀石經驗）：「最初喺大學接觸攀石運動，之後更玩埋抱石，喜歡在岩石間Movement的感覺。攀石較講求耐力，抱石較着重爆發力。」

KC（1年抱石經驗）：「抱石的好處是可與一班志同道合朋友去戶外玩又得，放工一個人到室內場練習亦得，每次成功挑戰新難度都很有滿足感。」

查詢電話：2803 0567

撰文：布偉倫

攝影：盧展程