要數最「拖戲」嘅經典卡通片，相信《足球小將》必入三甲之列，想當年戴志偉踢衝力射球踢足半集。電視於1983年10月13日在日本首播後大受歡迎，數數手指已有30年。當年卡通播到1986年3月一共128集，由小學講到中學，後來更衍生唔少續篇，深入民心。
高橋陽一喺1981年開始連載嘅《足球小將》，最大魅力除咗戴志偉率領南葛小學過五關斬六將外，劇中每位角色都有招牌球技，例如樑仔顏面擋球、小志強猛虎射球等，但最誇張可說是立花兄弟使出「一飛衝天彈跳射球」。後來戴志偉等人中學畢業後，仲勁到去海外搵食，佢踢巴塞，小志強踢祖雲達斯，林源三做漢堡門將！好多讀者以為佢哋會代表日本踢世界盃，點知作者咁多年來只畫到日本隊備戰奧運，睇嚟仲有漫漫長路。
《足球小將》（小學至中學篇）1983年至1986年
《新足球小將》（遠征歐洲篇）1989年至1990年
《足球小將J》（世青篇）1994年至1995年
《足球小將Goal！》（濃縮重製版本）2001年至2002年
撰文：廖俊斌