GALAXY Round 彎王「智」屈機

Samsung GALAXY系列橫跨多個尺寸，機海戰術本身已屈機到爆，但廠商仲嫌未夠，日前加推首款曲面屏幕手機「彎王」GALAXY Round，屏幕一如其名微微彎曲，贏手感兼贏注目！水貨日前殺到香港，高開$7,180又吸引到你買嗎？

韓國市場推出

曲面屏幕並非今天才有，Samsung早把此技術引入OLED電視上，不過手機就到近日至推出，然而由於產量不多兼試水溫嘅關係，Round只會於韓國本土發售，想玩就只能買水貨啦。實物所見，其5.7吋屏幕沒有想像中彎得咁誇張，但視覺上已新鮮感爆燈，而且在彎曲機背下，手感不但比一般智能手機佳，放落褲袋仲緊貼大腿線條，唔怕頂住！

搖搖板式操作

小記把玩手機時，在旁同事已起哄爭住試，足證此機話題性十足。若各位以為它齋玩曲面Gimmick就錯喇，事關廠商為彎芒加入不同應用。最簡單是在屏幕熄芒時，只要將機身當搖搖板咁傾向右側，屏幕便會啟動並顯示未接來電、時間及剩餘電量等資訊。而在睇相或聽歌時，把機身往左或往右搖，則可觀看相庫目錄及跳播歌曲，毋須入Menu慢慢揀，好玩又實用。

水平睇機身時，可見兩邊微微翹起。

熄芒時一搖機身，便會彈出未接來電及時間等資訊。

原生中文介面

新機叫價$7,180，除了因為夠噱頭外，頂級規格亦是主因。其硬件跟Note 3幾近相同，內置2.3GHz四核心處理器、3GB RAM及32GB內存，對應1,300萬像素鏡頭及4K超高清拍攝，無論打機或影相拍片都有極高質素。另一方面，玩水貨機最擔心係語言及網絡問題，呢方面大家可以放心，事關它預載原生中文介面及中文輸入法之餘，還對應雙頻LTE，香港4G用戶唔怕上網變龜速。