13種濾鏡E-PL6 秋高戲相

有冇發覺近排天氣涼咗好多？秋天最啱做嘅戶外活動梗係行山遠足，順道拍攝沿途風光。不過淨係帶部手機去Snapshot，又冇得Zoom又唔夠靚，所以今次模特兒Shannie帶埋Olympus全新E-PL6無反細機上山，貪佢可170度翻芒玩「人景合一」自拍，仲內置13種濾鏡，施展戲法影靚相！

售價：$4,990（14~42mm單鏡套裝）$5,990（14~42mm及40~150mm雙鏡套裝）

170度翻芒最啱自拍

攀山越嶺俯瞰壯麗景色，影靚相可說是指定動作，但Shannie話齋影景太乏味，不如搞搞新意思玩「人景合一」自拍，E-PL6嘅3吋觸屏可170度向上或65度向下翻動，讓用家睇住個芒對準位影相；屏幕仲備有輕觸快門功能，用手指篤一篤芒便可對焦拍攝，確保唔會Focus錯隔籬。再者它內置高階機款的FAST對焦系統，對焦速度拍得住單反，捕捉高速移動的主體輕而易舉。

感光度ISO 100起跳

遠足當日天公作美，太陽光線都幾勁，換着以往M4/3機款的感光度由ISO 200起跳，就有機會要加塊ND Filter減光。新機將最低感光度向下延伸一級，備有ISO Low（ISO 100）選擇，最高感光度則可達ISO 25,600，無論遇上猛烈陽光抑或陰暗天色都影到靚相。規格方面則採用1,610萬像素感光元件及TruePic VI影像處理器，擁有每秒8張連拍速度，即使有雀仔飛過，都能夠捕捉其飛翔動作。Shannie就最鍾意佢有13種濾鏡特效咁多，難怪影到停唔到手。

轉盤的「ART」模式備有13種濾鏡特效可揀。

HotShoe、收音咪和喇叭一併排列在機頂上。

Time Lapse縮時攝影

近期成日見網上有人Post郁得好快嘅日出日落短片，新機亦緊隨潮流加入縮時攝影（Time Lapse）功能，拍攝張數最多為99張，至於間隔時間可設定為1秒至24小時，由於設定簡單，Shannie一陣就學曉，仲拍咗一段日落Time Lapse片先肯走。而且機身加入雙軸電子水平儀，能自動偵測水平和垂直方向，確保拍片時能保持水平狀態。值得一提，新機備有黑、白、銀和紅4色選擇，並加入替換式手柄設計，方便配搭出各種色系。