1:6 Superman 「超」大隻 打到嚟

悲劇英雄 頭雕神似

當擋子彈打大炮不能引起觀眾興趣，新電影換上《蝙蝠俠：黑夜之神》系列的Christopher Nolan監製，將超人塑造成更現實、更人性化的悲劇英雄。連主角亦換上粗獷味十足的Henry Cavill，比起前幾代超人，飽歷風霜感覺增加不少。Hot Toys首席頭雕師Yulli，成功把以上氣質還原到1:6 Figure上，頭雕眉頭深鎖、雙唇閉合，同時保留演員高額角、高鼻樑等特徵，配合美術總監JC. Hong的臉部塗裝，忠實將這個非一般英雄帶到大家眼前。

激凸Body 保持靈活

電影的導演Zack Snyder拍過《戰狼300》，可知其偏好陽剛味重的肌肉男，主角特別為此增加15磅肌肉。Figure冇得做Gym舉鐵，廠商惟有找來Joseph Tsang擔任其素體造型師，由於他製作血獸、異形等起家，最叻拿捏肌理結構，故新超人Body的膊頭、胸肌甚至腹肌都顯而易見，腳瓜更澎湃得猶如筋肉人一樣，最重要係關節Keep到30個以上，玩落比包膠Body靈活得多。嫌未夠誇張？廠商還在緊身戰衣髹上黑影，保證任何角度睇都咁激凸！

五官似唔在講，連表情都咁憂鬱，形神俱備。

長靴由布料及PVC混合而成，筆挺得來不失靈活性。

緊身戰衣 配件驚喜

超人造型改變，連帶新戰衣都大幅改良，一是採用類似蜘蛛俠的網狀彈性布料，二是夾番電影氛圍，主色及胸前Logo變得黯淡。Figure自然跟到足，例如緊身衣以高純度環氧樹脂打造，貼身得來又具拉扯性，擺甫士時都唔驚爆胎。另外，戰衣表面經過滴膠處理，以營造出網狀質感及花紋，同時又以PVC製作胸前S字標誌，既可呈現出立體感，又利於控制色調，令原來的紅黃對比度大幅調低。配件亦有驚喜，除了不同款式的造型手外，地台亦設計成超人Logo，最意外係送埋1:1 Command Key，以慶祝Hot Toys第200款Movie Masterpiece Series（MMS）誕生，咁矜貴唔知又引來幾多人排隊訂貨呢？

素體提供30個以上關節，並有31cm高。	暗紅色斗篷沒有鐵線骨架，雖然望落較自然，但擺甫士冇咁型。	地台唔係傳統嘅黑色Stand，而係以經典超人Logo做圖案。

粉絲有Say

美式漫畫店Clark's Comics老闆，兼本地知名超人粉絲Jerome Kwan稱：「之前Brandon Routh飾演嘅超人好令人失望，感覺太柔弱。新超人由Henry Cavill擔演，淨係外觀已夠Man，今次仲有IMAX版，相信會比上集好睇。至於Hot Toys隻Figure頭雕似到爆，但稍嫌大隻過龍，若量產時稍為減磅就更好！」

為慶祝第200款MMS誕生，跟盒附送1:1 Command Key。	附送飛行、舉物、拳頭及放鬆多款造型手。	新舊Figure比較 兩代超人比較，Henry Cavill新版（左）Sell大隻，Christopher Reeve舊版（右）賣經典，各具特色。

同場加映：超人Gadgets搶閘現身

超人嘅影響力無遠弗屆，除咗Figure，同期Gadgets品牌Gavio亦有一系列以超人為主題的新產品推出，粉絲們要留意了！

Jackin' Juice外置電池 表面印有超人大特寫的手機「尿袋」充電池，容量有2,800mAh，並可循環使用300次。 售價︰$248	Plush Pocket三色卡套 背後附有3M貼紙的卡片套，只要撕開貼紙便可貼於任何手機機背上，顏色有藍、紅、黑3款。 售價︰$98/各	Gruuve Gazz紅藍耳機 根據超人衣物顏色而設計的扁線耳機，內置8mm單元，阻抗只有16ohm，手機都推得郁。 售價︰$298
Metallon Zinc低調流線 金屬扁線耳機，外觀極具線條美，超人Logo則較細，適合喜歡低調的人士佩戴。 售價︰$398

查詢電話︰3188 0670

撰文︰陳志滔　

攝影︰郭凱敏

查詢電話︰2388 4677