ONE TOUCH STAR雙卡伴「旅」

就快到暑假旅遊旺季，梗係要外遊Relax一下。身處外地，上網、通話總唔少得，想慳番漫遊費用的話，最好買張當地SIM卡，配埋部雙卡手機，WhatsApp或打卡都可以一Take過。Alcatel啱啱出咗部雙卡手機ONE TOUCH STAR，機價唔使$1,500，買嚟做旅行專「機」都唔會肉赤！

售價：$1,499
機面不設實體鍵，而輕觸按鈕反應幾好。

雙SIM靈活應用

小記每逢公幹或旅行，例必喺當地買張SIM卡，皆因上網數據費用平一截，另會開着原有電話卡方便通話，所以成日要帶住兩部手機跟身。如果改用ONE TOUCH STAR就方便得多，皆因新機支援雙卡雙待功能，兩個SIM卡槽各自支援GSM四頻制式，其中一張SIM卡仲可3G上網，成日外遊嘅用家最啱用。一如其他雙卡手機，它亦可設定主卡功能，訊號圖示還有不同顏色作識別；每逢撥號或傳短訊前，系統更會彈出Menu畀你揀SIM卡，夠晒清楚。

入門機規格

由於新機走入門路線，規格當然與旗艦機冇得比，1GHz雙核心處理器、512MB RAM雖可流暢操控Android 4.1系統，但想玩要求較高嘅遊戲Apps就有點吃力啦！幸好4吋屏幕採用AMOLED面板，色調鮮艷、對比度高，用嚟睇片和上網都好正。此外，機身四邊加入銀色金屬物料，配合黑色機面，機背還隱約見到髮絲紋，格調即時提升。值得一提，除了今次抵港嘅黑色版外，新機其實另有銀、白、粉紅3色，期待於香港正式推出。