Xperia SP玩連動 PS3手掣Chok招

手機遊戲Apps近年愈出愈正，無論畫面、好玩程度都拍得住手提遊戲機甚至家用Console；唯獨是一定要篤芒或體感操作，玩得耐都幾攰。遊戲界老大哥Sony就睇中呢一點，喺啱啱上架嘅新機Xperia SP，支援無線連接PS3嘅DualShock 3手掣，即是說用打機手掣便可操控手機，以後搭車時見到人用手掣「Chok招」唔好大驚小怪啦！

售價：$3,398

無線駁手掣

家用遊戲機嘅手掣向來手感舒服，唔少PC機迷都特登買番個轉插器駁嚟打機。今次Xperia SP嘅玩法更方便，支援無線連接PS3嘅DualShock 3手掣，只要事先將手機與手掣配對好，便可經藍芽作遙距操控。小記測試時發覺連接方便之餘，同步操作流暢；試玩《Sonic CD Lite》遊戲，以Analog掣取代篤芒確實好玩得多，再透過MHL線接駁大電視，感覺似足玩緊家用遊戲機。不過要留意，雖然手掣可用來控制手機，但唔係隻隻遊戲Apps都支援，睇嚟要逐隻遊戲試啦！

搶眼透明帶

自Sony單飛發展後，新機如Xperia S都採用發光透明帶設計，好多用家都大讚靚仔。新機承繼呢個設計，機身下方同樣加入一條透明帶，仲識得着紅、白、藍等7種顏色，每逢來電、SMS時便會亮起；最正係燈光會因應顯示相片嘅色調或者播歌嘅節拍而轉色，相當有型！而且新機嘅修長設計帶有幾分和風感覺，機側Power鍵更沿用Xperia Z金屬物料，型格靚仔。唯一可惜係背殼雖然可以拆開，亦可插入記憶卡擴充容量，但電池就唔換得，帶外置充電器出街應該唔少得。

機側與旗艦作Xperia Z一樣，備有金屬Power鍵，靚仔有心思。

拆下背殼便可更換SIM卡及記憶卡，但係冇得換電。

4G LTE通行

新機另一賣點係支援多頻4G LTE制式，香港常用嘅1800、2600MHz頻譜當然冇問題；更兼容800、850、900、2100MHz，就算外遊去日本、韓國、歐洲等地都用到4G網絡，稱得上世界通行！規格方面，新機雖然走中階路線，但仍備有1.7GHz雙核心處理器及1GB RAM，最抵讚係其4.6吋屏幕解像度達720p，更植入招牌的Mobile BRAVIA Engine 2技術，色調自然又清晰；若然唔鍾意預設色調，新機仲內置白平衡供調校，睇片時想Tune冷暖色調都冇問題。