西太后SH-01E 金光貴氣

時裝大師Vivienne Westwood講過：「You have a more interesting life if you wear impressive clothes.」原來「西太后」不但對時裝有要求，連手機設計都一樣令人有深刻印象；今次就決定踩入科技界，與兩大日本手機巨頭Sharp及DoCoMo聯乘推出新手機SH-01E。呢部全球限量30,000部嘅別注版，大玩電鍍金色機身之餘，背殼仲換上迷彩Vivienne Westwood Orb花紋，粉絲又點可以唔入貨呢？

售價：$5,280

浮誇金機

與時裝品牌聯乘嘅手機向來唔多，比較出名要數Prada Phone，不過全黑機身甚為低調。反觀今次呢部SH-01E嘅設計就大膽得多，將原本只有粉紅、白、黑、藍４色嘅原作嚟個「大翻新」，無論機面、機背以至邊框都換上電鍍金色；最精彩係背殼於金色電鍍物料上，再刻上迷彩Vivienne Westwood招牌木星Orb 圖案，手感特別，而且極盡浮誇，可以話貫徹「西太后」風格。

招牌主題

雖然唔知「西太后」有冇親自主理新機嘅設計，不過這位Punk界殿堂人物一定Like呢部機，皆因別注版新機連介面都加入「西太后」最愛嘅元素。先有16款獨家Wallpapers，簡約迷彩花紋、紅心Monogram，以及黑底紅骷髏圖案，點揀點襯任你選擇。要數「西太后」至愛，點可以數漏「Harris Tweed」呢隻經典布料，新機特設名為「Tartan」嘅主題，將布料花紋轉做Wallpaper之餘，更連主頁應用程式Icons都換成藝術Style，靚得交關。可惜嘅係專屬主題暫時只得一款，如果有多幾款更換就好啦！

充電座即插即用，連USB蓋都唔使打開。

連包裝盒同手機背殼個Pattern都跟番一Set，有心思！

和風內涵

心水清嘅朋友應該記得原作SH-01E早於10月已經推出，今次別注版嘅內涵其實同原作一模一樣。當中較特別係用上4.1吋CG Silicon靚芒，而且解像度達qHD質素，色水、對比度都唔錯，配合附送嘅充電座，用嚟睇片就啱晒！最重要係搭載1,210萬像素鏡頭，配合場景模式、防手震、HDR等實用拍攝功能，幫自己影番幾幅街頭Snapshot就最好不過。規格方面，新機內置1.5GHz雙核心處理器及1GB RAM，加上支援埋IPX5/7防水標準，雖然未算頂級，但相信一眾時裝精都唔會太介意。