Volkswagen拉花甲蟲浪漫影沙龍

平安夜想同愛侶度過一個浪漫節日，又唔想喺尖東、銅鑼灣同人逼餐懵，不如遊吓車河，揸架Volkswagen聖誕Beetle上山頂，順便沿盧吉道及夏力道的步行徑走一圈，欣賞日落與維港兩岸美景。晚飯後行吓凌霄閣，然後落中環愛丁堡廣場，搵國金、怡和大廈做背景，影番輯聖誕「沙龍」留個美好回憶。

售價：$269,800

山頂飽覽港島美景

山頂向來是拍拖勝地，情侶於涼風下相擁賞景，或在絕色夜景下為另一半送上禮物，都讓這個聖誕更為難忘，且山頂廣場及凌霄閣不乏餐廳食肆，要過一個豐盛的聖誕夜並冇難度。山頂廣場一帶設有室內停車場及咪錶位，泊好車後行兩、三分鐘便是步行徑的入口，環繞山頂走一圈大概1小時，沿途飽覽港島南北景致。如果想遠眺九龍半島、青馬大橋，則可選擇到龍翔道觀景台或青嶼幹線觀景台，兩個地方都設有停車場，可Set支腳架慢慢影，不用擔心吃「牛肉乾」。

聖誕Look大受歡迎

今次同行是Volkswagen充滿聖誕色彩的拉花Beetle，頭冚和車尾都有「Merry Christmas」字樣，車門、車頂分別有雪花、鹿車和聖誕樹剪影，泊在中環大會堂對開，唔少途人都要求同部車合照，小「甲蟲」頓時變成大「明星」！「聖誕甲蟲」是以Beetle 1.2 TSI打造出來，除咗車身拉花外，其餘部分都與標準版相同，造型依然咁可愛、咁得人歡喜。新Beetle的體積較上代放大了不少，長、闊度達至4,278×1,808mm，分別增加了152mm及84mm，頂部不再採用前一代的弧形設計，配合更大、更闊的輪拱，注入不少運動氣息。

與聖誕甲蟲同行遊山頂，十分寫意。

山頂廣場及凌霄閣集購物、飲食、娛樂，是理想拍拖勝地。

龍翔道觀景台是欣賞九龍半島的上佳位置。

DSG波箱換檔快捷

新車搭載的引擎是廣泛採用的鎂合金物料製造，最大馬力105ps，可於1,550~4,100rpm時釋出175Nm扭力，加上車重只得1,297kg，載滿人由中環沿馬己仙峽道往山頂游刃有餘。此外，新「甲蟲」還配上七前速DSG雙離合器波箱，不但換檔快，程式亦非常聰明，落斜時只要輕踩迫力，便會自動拖低一至兩個檔位，利用引擎制動原理減慢速度，減少制動系統的負荷。廠方指，每100km耗油量只需5.9L，二氧化碳排放量僅為137g/km。目前，廠方已將Bi-Xenon頭燈、Panoramic玻璃天幕、雙區域恒溫冷氣等列為標準配置，車價只不過是$269,800，可會心動嗎？

車身拉花非常應景，頭冚和車尾都有「Merry Christmas」字樣。	車頂設有Panoramic玻璃天幕，更加開揚。	門邊和內櫳飾板與車身顏色互相呼應，感覺更一致。
原廠配上6.5吋輕觸式大面板屏幕，並連接泊車監測系統。	波箱用上七前速DSG，轉波速度非常快捷。	後排雙座位布局，空間不錯。