30cm鐵甲萬能俠精密解構

Bandai最新的「DX超合金魂」系列，搵來人氣高企的鐵甲萬能俠打頭陣，早前廠方發布圖片和舉行展覽時，已見到充滿光澤的合金外甲，內藏精密細緻結構，加上高30cm，引到一眾粉絲流晒口水。這隻年度壓軸作終於今個禮拜尾抵港，小記試玩時發現內裏有齊發聲和發光裝置，播住主題曲時機體心口及雙眼識得發光，擺入附送的整備基地內，型到爆燈！

售價：36,750日圓

全彩內構合金裝甲

以往展出DX鐵甲萬能俠時，玩具都係有得睇、冇得摸，而新作一大賣點，是首次為機體炮製出完整內構圖，內構大部分以PVC全彩製作，如腳掌的油壓連動、手肘的鋼釘飛彈、胸口的機械構造等，塗裝極之精細。裝甲方面，除雙手及頭部外，其他部分幾乎全以Die-cast合金炮製，足料墜手，玩家更可展示半身裝甲、半身內構形態，甚至連胸甲高熱板也分成實色和透光兩款可作換件，隨時施展出絕招高熱火燄！

手臂連接有待改善

DX鐵甲萬能俠雖以質量取勝，但可動性就不如SR合金版本，如單關節的膝蓋只容許有限度屈曲，腰部又沒有拉出式關節，令玩具不能拗後。另外，為表現手臂發射鋼釘飛彈姿勢，玩具附送專用上臂外甲幫助連接；可惜因遷就飛拳造型，上下臂的連接榫位較鬆，引致未能扣實，稍有郁動便有機會鬆脫，如坑紋跟插孔的卡位能扣緊一點會更好。

打開收納盒會見到基地內貌，兩側留有掛位可懸掛裝甲。

拆開面罩可見到頭部光子力射線及頭冠內部結構。

胸部可獨立取出，安裝2枚3A電池便可啟動發光和發聲功能。

附設基地發光展示

新作要親手玩過才知內裏玄機，事關胸部內構竟加入發光跟發聲功能，只要裝入2枚3A電池，玩家便可透過遙控器操作，令它雙眼着燈、胸甲透光，亦可發出射擊聲效，最過癮是機身識得唱2首卡通主題曲，邊玩邊聽歌，童年回憶立時返晒嚟。而附送的收納盒展示台，左右打開便可變成秘密基地，又附上工程車及吊臂作裝飾，活門內側更可懸掛裝甲作收納用途；底部裝入3枚3A電池更可啟動LED燈，照亮30cm高機體，英氣十足。

腳掌連接小腿備有油壓連動，連小腿內的齒輪都有詳細交代。	玩具附上原版漫畫，讓玩家重溫當年鐵甲萬能俠英姿。	裝甲大多以合金製作，背部留有位置作發聲之用。
換上透光版胸甲，即能重現絕招高熱火燄。	手臂內藏鋼釘飛彈，可利用上臂外甲做到發射甫士。	朋友號內部見到駕駛員兜甲兒，且雙翼可上下摺疊。