1,300萬像素Xperia V 4G防水首影

每逢臨近購物旺季，手機市場定必「Phone」起雲湧，先有Nokia WP8新機強勢回歸，再有Google親生仔Nexus 4登場。作為日系手機代表嘅Sony怎可怠慢，Xperia V不但備有1,300萬像素鏡頭、瀛風玩色設計，更屬首部同時兼備4G LTE制式及防水功能的智能手機，簡直將所有至Hit配置集於一身！機價只需$4,398，比其他品牌嘅旗艦機平一截，買嚟過聖誕就最啱。

售價：$4,398（12月中發售）

打通全球網絡

現時各大台嘅4G網絡唔止戶外收到，連室內甚至港鐵都覆蓋埋，絕對係轉用4G上網嘅好時機。廠商當然睇到呢個趨勢，故Xperia V全面支援LTE 1800及2600MHz頻譜，香港所有4G網絡都用得到，上網自然快得多。小記於發布會即場以《OFCA》App測試，速度平均達30Mbps，用來下載大型Apps、網上影片等都可極速搞掂。機身仲額外支援埋800、850及2100MHz 3個4G頻譜，去到歐洲、日韓等國家都啱用，聖誕新年外遊時都唔使換機啦！

9款特效濾鏡

Xperia系列向來以影相作為賣點，新機當然唔例外，單睇1,300萬像素鏡頭已拍得住同廠Snapshot王Xperia TX。而且Sony特意強化拍攝功能，除了有影風景必備的HDR模式外，更新增Superior Auto高級自動模式，拍攝時會幫用家偵測合適場景。小記試拍時發現其捕光準確，用來影燈飾布置都掂！此外，新機更內置懷舊、局部彩顏、萬花筒等9款濾鏡，更可9款特效同一時間做拍攝預覽，玩味十足。

機背採用弧形設計，美感十足，握上手時特別舒服。

機身不設實體鍵，令機面設計更加簡約。

生活防水設計

驟眼睇新機設計，確實與同門Xperia TX有幾分相似，同樣用上弧形機背，連黑、白、桃紅配色都跟到足，但細節就全部「升呢」。4.3吋屏幕解像度不但備有720p級數，更內置Mobile BRAVIA Engine 2技術，畫面對比度比上代更強；最重要是支援防水防塵功能，達IP57國際防護標準，即可於1米水深正常操作30分鐘，讓各位於傾盆大雨下都可照玩Snapshot。值得一提，新機雖然沿用1.5GHz雙核心處理器，但換上Qualcomm最新S4型號，操作表現更佳，抵讚！

支援防水防塵功能，背殼及插口位可見防水膠邊。	microSIM卡放於特製卡套內。而換卡時必須拆電。	備有桃紅、白、黑3色選擇，女仔唔使問都揀桃紅色啦！
即場比較Mobile BRAVIA Engine 2威力，右邊畫面明顯銳利得多，暗位層次亦較分明。	放大圖片