用心Sing說心聲

書友變Band友

二人組合的二人，分別是主音Nicole與創作人阿P，來自同一大學同一級別，相識於01、02年，那時男的無無聊聊拿起結他，邊彈邊唱邊改詞，女的同樣沒事做，坐在一旁邊聽邊笑邊夾歌，就是這樣開始了一段若即若離的合作關係，前後歷時11年。

有別於一般Band Sound，my little airport的創作一向是「分割」的，題材則是親身經歷，像《I Don't Know How To Download Good AV Like Iris Does》、《Terence的心事》、《你是浪子，別泊岸》等，全是從身邊朋友獲得啟發。負責創作部分的阿P坦言，獨自創作好玩啲：「我喜歡自己創作，比較有新鮮感。其實我哋試過一齊創作，一人寫一段，但真係好難接落去。MV模式亦係由我構思，問她意見好少唔好，搞到我以為自己真係做得好好，哈哈哈！」

嫖客是一面鏡

說回新專輯《寂寞的星期五》，收錄了17首歌，主力創作的P負責了15首，率先上載的歌曲包括《憂傷的嫖客》、《廣州足浴一夜》等，少了《Donald Tsang, please die》、《瓜分林瑞麟三十萬薪金》等時事題材，皆因阿P認為反政府的聲音已夠嘹亮，「每天一打開面書，意見排山倒海，類似想法已有人發表，講得又好，所以今次想講多啲自己心聲。事實上，之前好多歌都係對外的，可能係針對一個特定嘅人，或者係向世界講說話，雖然新專輯嘅歌都係講人，例如鳳姐、嫖客、足浴按摩師、牛頭角青年，但主體係自己，好似照鏡一樣，嘗試接觸靈魂深處，同自己講『道理』，為生活上各種問題提供解脫方法，令心情變得舒暢。像《嫖客》一曲，通過鳳姐把口，說出很多慰藉嫖客心靈嘅讀白，如『你不用那麼傷心，早晚你會找到一個喜歡你的人』、『如果不合適就早點分開，以後的日子還長呢』看似感人至深，但最後冷不防一句：『哎，小費可以多給一點嗎？』讓你猛然發現，原來花費唇舌講慰藉說話，純粹為賺取物質回報……」

不為出碟寫歌

對於寫歌，P自言不會為了出碟而趕工找靈感，每一首歌都是源自日常生活中突如其來的感應：「例如上年有個廣州Tour，我哋食過飯後，走咗去按腳，那位按摩技師講咗好多嘢，返到酒店，我立即抄低，之後就做了一首歌叫《廣州足浴一夜》，寫畀嗰位喺廣州從事足浴、從未見過海嘅少女。又好似《菊花的味道》，係我喺過馬路時突然想起，又覺得呢個名唔錯，於是喺沖涼嗰陣噏歌詞，後來又覺得可以成為一首歌：『這個世界的道理我未能逐一參透到／只知太快樂是一種虛無／』講緊有些事，你從未試過，身邊人可能叫你唔好試，但其實想就應該去做，有時，帶有痛楚的快樂，可令人更加難忘……」

生活是自己選的

熟悉my little airport的歌，不難發現其歌詞常常跟工作扯上關係，成名作《邊一個發明了返工》如是，到《公司裁員三百人》、《西西弗斯之歌》又如是，再到新碟的《爺就是一名辭職X》亦如是，但其實背後用意不是要反映返工有幾苦，而是希望向聽眾表明：一切都是自己的選擇，一是Lead到自己生活，一種是被生活Lead番轉頭。「早前在網上看見一篇文章，有個男人用好大篇幅，寫自己婚後生活好灰，返工好慘，老婆好衰，性事好唔如意，仲有兩個細路……我覺得，呢個人最妙嘅地方係，佢好清楚自己嘅處境，明白自己嘅感覺同意願，但點解一個咁清楚自己有乜生活問題嘅人，都會畀生活搞到咁慘？《邊一個發明了返工》係想叫大家趁自己可以唔做工時，早啲轉工。《西西弗斯之歌》亦不止講工作，其實係一個觀念嘅改變，由希臘神話中西西弗斯被諸神懲罰，終身推石頭上山嘅故事得到啟發，希望大家明白，就算生活本是荒謬、痛苦，但當洞悉情況，轉換心情去面對，亦能感到快樂。其實這些人生道理全部人都知，只係大家唔敢去做，如果人人都能抱住世界末日快到嘅想法，應該能更勇敢地實現自己想做嘅事。」

後記：寫歌才有真心話

透過有趣大膽的歌詞，不止香港，my little airport在內地及台灣也有不少粉絲。P笑指，自己能自由創作，是因為抑壓過甚：「我諗平時自己太不誠實，很少對別人說出真心話，可能只會同三、四個人講。曾經有朋友向我『投訴』，除了寫歌嘅時候，我都好假，寫啲歌卻會說出心底話。或許my little airport予人感覺清新得來又有啲賤格，好似電影《賤熊》一樣，一隻外表可愛嘅熊公仔，卻成日講粗口、泡妞、吸煙、飲酒，因而與眾不同吧！」

二人合作11年，曾有過拆夥危機，那時Nicole受不了香港的壓迫感，跑上北京定居3年，一心過新生活，期間曾於當地跟其他人組Band，至今年年頭才回來。「北京之行，某程度上係一種逃避，但一定要經歷的，讓我明白到不能勉強自己（改變），只需要找適合自己的生存方法便行。」

PROFILE

由林鵬（阿P）與區健瑩（Nicole）組成的唱作組合，04年發表第一張專輯《在動物園散步才是正經事》，之後陸續推出《只因當時太緊張》（05年）、《我們在炎熱與抑鬱的夏天，無法停止抽煙》（07年）、《介乎法國與旺角的詩意》（09年）、《香港是個大商場》（11年），以及新專輯《寂寞的星期五》，其曲風走自由、清新路線，配上大膽歌詞，代表作包括《邊一個發明了返工》、《讓我搭一班會爆炸的飛機》、《浪漫九龍塘》等。

撰文：郭淑怡　

部分攝影：盧展程

部分相片：由受訪者提供