現今的飯局，都是一樣——菜式上了枱，食客未起筷，手機卻要率先品嘗。
話說在某飯局，我一邊拍食物一邊上載到Facebook一邊「打卡」，Multi-tasking到不可開交，在座朋友竟說：「你知唔知，有酒店廚師成日響酒店拍乜拍物，拍到畀老總即時炒咗？」吓？廚房除可炮製美食，也果然可焗製很多是非。
話說城中某酒店的兩位老外廚師，一正一副，正廚入職後，更拉攏同鄉副廚加盟，兩兄弟拍硬檔，未做出成績，已先露出邪惡真身，好食懶非處事苟且不尊重華人同事，擺明意圖賺取高薪厚職兼房屋津貼做土霸王。最惹人反感的，是他倆很愛玩拍攝，餐枱未潔淨、地氈藏污垢、酒杯有手指模、碗碟開始甩色，都一一拍下，然後直接傳送給酒店總經理！
我問：「佢倆個都叫做部門主管，酒店有乜問題，尤其係同飲食有關嘅，佢哋都有責任o架，同其他部門一齊傾吓、一齊解決都得啫，點解要隊到上大哥嗰度？」朋友答：「咁咪顯得佢哋倆個好醒，所有問題都係人哋嘅錯囉！」
同是老外的大哥經常借了聾耳陳隻耳，後來離職了，由另一老總掌權，立即向兩位大爺頒布「拍攝禁令」，可惜兩人繼續龍友上身，以相片諉過於人，結果被老總一腳踢走，酒店終於回復天下太平。可靠消息指出，餐飲部快將有新人上場，希望帶來一片新氣象，至少打救一下個自助餐。
網址：www.chan-wai.com