TAG Heuer RACER　矜貴錶準

股市大起大落，唔少朋友都買金、買樓、買錶保值，近期小記發現多一個好選擇，就係名廠奢華手機，始終呢啲機喺祖國有價有市。瑞士鐘錶品牌TAG Heuer新智能手機RACER，機身不但以仿GT賽車設計，仲混入碳纖維、不銹鋼、18K金等名貴用料，標價$25,800起，絕對係身份象徵！

採用Android 2.3智能系統，提供5版首頁。售價︰$25,800起

背蓋仿頭冚設計

TAG Heuer出手機並非新構思，早於兩年前已出過首作MERIDIIST，後來又推出智能手機LINK，後者的鑽石版售價逾廿萬元，可謂貴到飛起！新機RACER冇用鑽石咁誇張，但用料一樣矜貴，例如機面以碳纖維及F1輪胎專用橡膠製成，防磨抗壓兼防腐蝕；加上表面有納米塗層保護，耐用得來仲勁好手感！邊框則以316L精鋼打造，背蓋更有碳纖維、鋁、陽極鋁、鈦金屬及18K金等選擇，配合網紋及凹凸紋理，恍如跑車頭冚，貴氣與霸氣兼備！

法國手製產量少

TAG Heuer擁有逾150年製錶經驗，腕錶出晒名以人手製作。RACER做工亦不遑多讓，在瑞士研發，再在法國以人手裝嵌，由於全球只有20名工匠，因此每天僅能出產15部，激罕之餘仲流露出Blue Blood氣息。拎上手細看，會發現機側及背蓋均有不少用以加固的小螺絲，設計猶如腕錶底蓋螺絲一樣，官方更表示螺絲可換上18K金，令貴氣進一步提升！

可選用鋁、陽極鋁及鈦金屬等不同物料來打造背蓋。

只要輕按機側圓鍵，便能開蓋更換SIM卡及記憶卡。

名錶牆紙專屬App

RACER另一破格之處是把I/O介面隱藏起來，機側設有一個圓形按鈕，只要輕按便能打開SIM卡及microSD插口，此舉既可防塵，又能把突兀介面收起來，值得一讚！硬件方面，1GHz單核處理器及Android 2.3系統唔算標青，但專屬內容卻贏晒其他Smartphone對手，例如Wallpapers 以名錶作主題，並內置《SO Apps》及《Mobile Security》Apps，前者精挑應用程式，後者則能加密防盜，萬一遺失了手機都不怕資料外洩。