不久前，發展局局長陳茂波才發表聲明，指對妻子持股擁有的物業涉嫌違規劏房一事「全不知情」。怎料隔了兩天，給挖出證據後，陳茂波又發表聲明，指「不知情」的回應是針對物業的現況，他早在97年已辭任董事。類似的「捉字蝨」回應方法，自從梁振英上任後便經常出現，為我們上了語言藝術寶貴的一課。
試想，阿媽問阿仔「做咗功課未？」，阿仔答「做咗」。及後阿媽發現阿仔掛住玩，根本沒有做功課，於是教訓阿仔「你唔單止冇做功課，而且講大話，這是不對的。」阿仔聰明如陳茂波，說「我答你做咗，是指昨日的功課。我沒有講大話，昨日的功課的確是做咗。你又沒有問我做咗的，是昨日的功課還是今日的功課。」
問得你「做咗功課未」，當然是指今日的功課啦。正如你話對事件「全不知情」，怎會是只對「現況不知情」。事件發展至今，已經不僅是劏房違規問題，也涉及誠信。當然，當事人可以用阿仔的思考模式，說自己「沒有講大話」，不涉誠信。但高官們每次回應事件，都用這種「玩弄文字」的技巧回應，根本就不是溝通。
以後阿媽問阿仔，可能要問「你今日做咗功課未？」阿仔答「做咗」。阿媽要再問「我是指今日的英文、中文和數學三份功課喎，做咗未？」阿仔答「阿媽，你真係醒咗喎，我指做咗只係中文，英文和數學未做。」阿媽說「咁你仲唔快啲做？」阿仔答「因為我仲做緊中文，我說做咗只是做咗一分鐘，有排都未做完。」
同如此「精叻」的阿仔溝通，真係嘔血。
電郵：ray@openrice.com