Kia Sportage EX隨行漫步新娘潭

香港有唔少郊遊遠足徑，難度各有高低，並唔係每條山徑都適合一家大細遊玩。想搵條簡單路線行吓，船灣淡水湖西北角的新娘潭自然教育徑係不錯選擇，除咗路線短、難度低外，沿途仲設有多個燒烤場，最重要係欣賞到新娘潭嘅瀑布美景，到時記得影番張全家福，盡情享受家庭樂！

售價：$238,000

700米輕鬆路線

揸車去新娘潭自然教育徑很簡單，只要沿汀角路、新娘潭路往沙頭角方向行駛，過了涌尾再駛1分鐘左右，便能抵達新娘潭獅子亭對開的停車場，該處約有20個免費私家車位，而新娘潭自然教育徑和燒烤場的入口就在旁邊。新娘潭自然教育徑全長只有700米，而且坡幅不大，就算邊行邊影相，大概半個小時便能行畢；對於平日少運動、又冇乜行山遠足經驗嘅白領一族嚟講，難度不算太高！值得一提的是，教育徑沿途栽種了很多品種的樹木，並設有植物和地質介紹牌，行完如同上了一堂自然教育課呢！

SUV上車盤

到郊外旅行和燒烤，除咗要攜帶食物、飲品和燒烤用具外，有些人仲會帶埋風箏、單車去，喺呢個時間，載物量大的SUV最啱使！Kia Sportage EX屬中型SUV級別，長闊達4,440×1,855mm，而且Headroom比傳統三廂式私家車高，內櫳空間非常見使；若同時把後排座椅放平，大至滑水板、單車都放得落！至於設備，Sportage EX有齊恒溫冷氣、無匙啟動、雙天窗及起步防溜後系統，雖然如此齊全，但新車卻只售$238,000，比起歐、日SUV平一大截，實在是理想的SUV「上車」盤。

新娘潭橋兩旁栽種了不同樹木，環境優美。

出發前記得先看清楚地圖及注意事項，免生危險。

EX版備有恒溫冷氣，左右冷暖可獨立調校。

搶眼豐富色系　

Kia Sportage EX與LX的動力配置完全相同，搭載了一副2公升直四Dual CVVT引擎，最大的馬力、扭力輸出分別為166ps及20.1kgm，並配上六前速加減自動波箱，若與上代比較，除了性能提升外，用料和乘坐舒適度都有很大進步。平心而論，近年韓國車的優點不再單單是「平」，質素之高已不可同日而語。另外，為提升燃油效率，Sportage EX並沒有如市面大部分SUV般採用四驅設計，而是採用結構較簡單、耗油量較低的FF布局，對於不玩Off-Road的車主來說，無疑更為適合。留意今次代理共引入9隻色系，當中包括黃、橙、紅、藍等Sharp爆顏色，啱晒年輕人口味。