自由自在免交代 鍾嘉欣合約無戀事

28歲的鍾嘉欣（Linda），外表斯文，形象健康，有時候甚至覺得她純得不太適合複雜的娛樂圈。在加拿大溫哥華長大的她，19歲來港參選華姐，從未離開過家，一度以為香港是個黑社會地方，後順理成章加入娛樂圈，首個角色是代替廖碧兒《皆大歡喜》內的公主。那時候公司安排她與李亞男在將軍澳一個四百呎單位內同居，到現在二人仍然是好朋友。

這八年來，Linda演過的角色多不勝數，但總離不開乖乖女形象，她說：「我聽到咁樣，會有啲唔開心，如果觀眾一直對我嘅感覺都係乖乖女，即係話我仲未成功；其實我演過60歲80歲嘅老人家、卡通化可愛活潑、律師、對性好開放嘅壞女孩、警察、旺角wet妹，基本上醜、老、壞同乖嘅角色我都做過，所以真係唔想人哋只記得我係一個乖乖女！（咁多角色都演過，下一個目標係視后？）冇諗過，只要大家記得我拍過好多個角色，我已經好滿足！」

19歲來港參加華姐競選，鍾嘉欣絕無僅有的以性感泳衣亮相。	鍾嘉欣（中）當選2004年度國際華裔小姐冠軍，亞軍是曹敏莉（左）。	曾經與林峯是最佳的螢幕情侶，鍾嘉欣坦言也曾「愛上」對方！

演壞女孩感受深

很多人認為《溏心風暴》內的常在心，是Linda事業上的轉捩點，尤其成功塑造了她跟林峯這對螢幕情侶，賺了不少外快，不過於她自己而言，轉捩點卻是《金石良緣》中的旺角壞女孩，她說：「嗰陣係07年，我手頭上拍緊3套劇，日頭做《金石良緣》嘅旺角壞女孩，夜晚做《珠光寶氣》對性好開放嘅女仔，又演緊《花花刑警》嘅正氣警察，幾乎係精神分裂，嗰年我仲要因為食錯藥中毒，全身除咗塊面，個頭、膊頭、胸、手指等全部都係紅色，我出唔到活動，着衫都痛，醫生話再嚴重啲就會死，要食類固醇，等皮膚脫皮，嗰陣我唔見記者，拍完戲就返屋企，咁啱我喺《金》劇裏面演嘅壞女孩角色係講人嘅生命好寶貴，當時自己經歷緊病痛，所以感受好深！」

曾愛上劇中林峯

演過不同的角色，但現實中的Linda，感情生活卻非常悶蛋，最令人印象深刻，相信是跟林峯的緋聞，究竟孰真孰假？她說：「我係愛過《溏心風暴》中嘅程亮，啱啱拍戲時係比較難抽離，嗰陣時連我啲朋友都信以為真，話我哋係玩地下情，所以唔認！」有指Linda與「現任」男友伍允龍的五年情玩完，她只淡淡的說感情事向來希望低調處理，她認為她雖然是個藝人，但也不過是打份工，合約上沒有寫明要交代自己的感情生活、甚或一日三餐吃甚麼這些私人瑣事。

結婚事宜難控制

Linda說：「我鍾意自由，唔想交代咁多，所以我每次返加拿大時，我都會好奔放，甚至會喺條街上面大嗌，做番一個自由自在嘅自己！」若果拍拖會公開嗎？她說：「就算公開都唔會高調，（結婚呢？）依家都唔會諗住，以前細個覺得如果21歲唔結婚就會變老姑婆，依家28歲又話想30歲，到30歲又結唔到會唔開心，其實呢啲嘢邊控制到，plan咗都做唔到！不過我好鍾意小朋友，所以我一定會結婚生仔，我覺得我會係一個好太太、好媽媽，日日煮飯煲湯都冇問題！」說時滿有憧憬及信心。

後記：曾聽說過Linda的一些負面批評，跟她做訪問後，看得出她很努力表現佻脫活潑的一面，也努力在表達自己；如果那些批評是真的話，她的表現證明她真的長大了；相反，她一直在配合這個圈的遊戲規則，去當一個履行合約的「自由人」！

親自作曲

鍾嘉欣在電視上的花旦角色深入民心，未必有很多人記得她其實也是一位歌手，並已推出過三張唱片，今年十一月更會推出入行以來第四張唱片；而每張唱片嘉欣都會親自作曲，至於作曲靈感？她就笑言視乎心情，心情好的時候就會哼出輕快的歌曲，相反亦然，大家也許可在其歌曲內了解她的喜怒哀樂呢！

冧莊代言

形象健康的鍾嘉欣今年冧莊成為詩琳美容代言人，她自言最滿意自己的纖腰及長腿，還有嘴巴，她笑說：「有人話過我個嘴係呢行最細，櫻桃小嘴個個都鍾意！」問到嘉欣的keep fit心得？她說：「多做運動，食清淡啲，我亦會每星期做facial同按摩通淋巴，不過最重要都係保持心境開朗！」

採訪：Ada Lam

攝影：劉智源

場地：紅磡都會海逸酒店