確信愛是永恒 鍾麗緹靜待路盲情人

曾經是性感女神的標籤，鍾麗緹（Christy）不負所望，即使年屆40，但舉手投足間依然散發韻味。八年前移居北京的她，轉戰內地發展，第二任丈夫嚴錚是台灣音樂人，再婚後她誕下現年分別3歲半及2歲的女兒，連同14歲長女，一家五口原本生活愜意，惜命運弄人，去年宣布與嚴錚離婚，結束第二段婚姻。

感情令人成長

Christy說：「每一段感情或者婚姻都會令人成長，我之前太過獨立，可能我自己喺外國長大，外國嘅女人特別獨立，而中國女人就好傳統，最好唔好咁叻，有時仲應該要扮蠢；我16歲就開始做嘢，所以好細個已經建立咗有份責任感，even有咗老公都係，不過經歷咗咁多，我依家唔想咁強，自己都好攰想人氹我。我學識咗無論幾忙都要搵時間畀對方，愛係需要營養！」

Christy與首任丈夫Ross Glen育有一名女兒，現已14歲。	鍾麗緹閒時愛與女兒到海灘遊玩，穿上泳衣的她跟長女猶如兩姐妹。	懷着小女兒的鍾麗緹與第二任丈夫嚴錚。

問Christy現在還相信愛情嗎？她想了想續說：「我相信緣分，緣分包括愛情、家人、女兒、工作、朋友，不過緣分無得強求，尤其係愛情，有時候我覺得愛神好似同你玩遊戲咁，你愈追佢就愈跑，我第六感幾準，我知道有個人喺度等緊我，但唔知佢喺邊？可能佢塞緊車，又或者佢係好大男人，唔想問人路，所以搵唔到我，哈哈……」身為三女之母，她的擇偶條件亦相對有附帶要求：「除咗好錫我，仲要好錫我三個女，愛我就要愛埋佢哋，it's a package！」

把前額頭髮剪短的鍾麗緹，樣子更覺年輕。	鍾麗緹對愛情仍充滿憧憬。	鍾麗緹去年被拍得在北京與四眼男撐枱腳。

湊女開心感動

母愛是何等偉大，還沒有生兒育女的女人是不會明白的，Christy說帶女兒耗的精力比工作還要大，而當中的快樂也是用錢買不到的，她笑說：「我最細兩個女好黐我，一見到我着鞋知我要出街，就叫我唔好走，聽到心都軟埋！有時見佢哋喺度玩，好天真好得意，唔知點解會覺得好感動，會開心到流淚！」

做「朋友式」母親

現時唯一令她放不下心的，反而是長女，Christy解釋：「大女14歲，踏入青春期，呢個階段好敏感，我要做到好似佢朋友咁，唔可以好似阿媽咁煩，咁佢先會肯同我傾偈，我先知佢諗乜，我仲要做埋爸爸個角色呢，真係要好小心！」話雖如此，但若有位像Christy般漂亮吸引的「朋友式」母親，子女應當不會抗拒跟她溝通吧！

謹慎照顧囡囡

鍾麗緹雖為單親媽媽，但她對孩子的照顧絕不馬虎，現時兩歲的孻女仍需要喝奶，不過囡囡不喜歡喝牛奶，她就找來奶粉品牌illuma給寶貝女吃，她說：「囡囡一開始係飲人奶，後來就飲奶粉，我知大陸好多奶粉有問題，呢隻奶粉有足夠嘅營養，所以我每次返嚟香港都會買！」

頻與異性約會

離婚後的鍾麗緹其實不愁寂寞，早前分別在北京及香港被拍得與異性密會，而且舉止親暱，事後她笑言自己在外國長大比較熱情，拖手也不算是一回事，且看看她的「真命天子」何時現身！

後記：樂觀有正能量

跟鍾麗緹做訪問期間，她還像個小女孩般嘻嘻哈哈，或者因為其廣東話不純正，常常鬧出很多笑話。她說自己很樂觀，也認為人應該要有正能量，她深信心想就會事成；如此說來，她的「路盲情人」應該快趕到來了！

採訪：Ada Lam　

攝影：劉智源

髮型：Robbie@IL COLPO MASTERMIND

服裝：Escada　

首飾：David Yurman