初時都以為這套只賣約$120左右的下載遊戲《I am Alive》，純屬Kill Time的Casual Game，但睇見孤身尋找妻兒的幸存者主角在廢墟場景中闖蕩，更冒住隨時跌死、被其他幸存者殺死及耗盡體力的危險前進，玩落刺激驚險兼有新鮮感，等足4年先有得玩都係值得！
《I am Alive》初次露面是在08年E3遊戲展，最初話09年春天推出，唔知有意抑或無意，要延期到2012年先成功開發出這款以浩劫求生為題的冒險遊戲，日系遊戲玩家可以理解成《絕體絕命都市》的西洋版，但《I am Alive》無論遊戲畫面以至玩法有趣程度都較《絕》優勝。遊戲背景設在滿目瘡痍的美國大城市，仲刻意用上黑白色調加上空中瀰漫大量灰塵的風格，畫面相當有Feel，更能領略浩劫後的頹廢感覺。
要在廢墟中尋找生路，少不了擒來擒去、左跳右跳避開重重障礙，更引入一如波斯王子式的誇張跳躍。但不同之處是擒高擒低會不斷扣體力，要把握時間完成，如用力過度更會耗用真氣，要以極難在地圖上搵到的食物先可以補充體力，幾有挑戰性。遊戲入面，玩家並唔係唯一一個災後幸存者，但所遇到的幸存者各懷鬼胎，要因應每個人的特性去應付，有時候要免招惹麻煩運路走，有時候要拔刀解決，有些對手要用支空槍「嚇鬼」牽制對手，再諗計解決（基本上係冇子彈可用，好彩的話會間中搵到一粒），但被兩個或以上敵人圍住時，差不多必死無疑，難度甚高，啱晒Hard Core機迷口味！
類 型：冒險
開 發：Ubisoft Shanghai & Darkworks
平 台：Xbox LIVE Arcade/PS Network
推出日期：3月7日（Xbox）/4月（PSN）
售 價：1,200 MS Point（Xbox）/$118（PSN）
撰文：布偉倫