ONE TOUCH 995 ULTRA 平歎法式大芒

一年一度的手機界盛事Mobile World Congress正在西班牙巴塞隆拿舉行，各大廠商都力推新機；其實不用遠赴西班牙，在香港一樣有新機玩，皆因久未有新作的ALCATEL一口氣推出多部新機，手機、Tablet樣樣齊。其中ONE TOUCH 995 ULTRA最為吸引，除了採用近年大熱的Android系統，更配備4.3吋IPS大芒以及1.4GHz處理器，機能雖未算頂級，不過就只售$2,680，入門級肯定大有市場！

四邊圓角加上四個輕觸功能鍵，設計大路。

4.3吋IPS巨屏

近年大芒手機橫行，4吋、5吋的機種就最受歡迎；995 ULTRA都順應潮流換上4.3吋屏幕，加上採用質素較高的IPS屏幕，解像度亦達480×800，畫面細緻之餘，色彩還原力亦甚強，睇相時顏色自然又冇偏色，效果不錯！而且新機仲支援高清影片播放，嫌手機屏幕睇片唔夠爽的話，仲可以透過機底的HDMI直出大電視，又或者以DLNA無線連接，隨時將客廳變做電影院都仲得！

防滑機身設計

源於法國的ALCATEL，手機設計向來都幾有睇頭，例如貌似鏡盒的810以及橫推QWERTY機888都算突破；相比之下，995的設計就略嫌遜色。新機只採用大路的圓角設計，暫時亦只得黑、白兩種平實配色，整體設計只屬一般。幸好黑色機款的背殼經過磨沙處理，不容易黏上手指模及油漬，易於打理亦好好手感。值得一提的是，新機雖備有500萬像素自動對焦鏡頭，不過試相時發現測光不太準確，更不時出現曝光過度的情況，相信廠商正式賣街時要稍作調整。

機底備有HDMI輸出，可連接電視屏幕。

記憶卡支援熱插拔，方便隨時過相、過歌。

立體介面順暢

近年Android手機陸續改玩雙核心以至四核心處理器，但995卻依舊使用單核心處理器，規格上難免令人失望。不過實際操作上，1.4GHz處理器無論載入網頁Flash插件、換頁、開Apps都好順暢；唯一美中不足是只得512MB RAM，多開幾個Apps時就會出現輕微Lag機，記住要勤啲Kill Task喇！而系統方面，出廠時只採用Android 2.3而非Android 4.0，不過就特別預載SPB Shell 3D介面，除了備有3D換頁效果，更有流量管理器、數字版權管理工具，實用性相當不俗。