徐淑敏迷人Fair媽咪
在兄弟姊妹中，小記排中間，是典型的「唔上唔落」，既沒有大家姐特別生性的天賦，也沒有細妹特別得寵的本事，但對於「孻女拉心肝」這句話，從沒質疑。不過，身為兩女之母的靚太徐淑敏（Suki）非但沒有因為孻女身份而特別得寵，更因為自己不及家姐活潑而變得自卑……到自己榮升媽咪，自然不想孩子備受忽略，因此對家中一對小公主一視同仁，希望她們能夠在公平、愉快的環境下健康成長。
享受緊湊
人家三年抱兩，年紀輕輕的Suki更厲害，兩年內先後誕下一對小姊妹Vianna與Renee，由宅男女神變身賢妻良母，唯一不變的是甜美笑容。「本身好怕悶，如果要好長時間先做到幾樣嘢，我覺得唔好玩，最鍾意一氣呵成，好短時間完成好多事情，人生先會緊湊。」
問到湊女過程是否吃力，Suki邊笑邊說：「OK喎，尤其是細女，比大女更易湊，又唔會扭計，同埋屋企人多，個個都幫手湊，仲有時間做自己嘢；通常日間陪小朋友玩，夜晚則陪先生應酬，但兩個女好喜歡通屋走，如果日後生多個仔，真係會體力透支呢！」現時Suki既要兼顧家庭，又要發展生意，時間分配尚算可以，但仍擔心自己陪伴女兒的時間不夠多，因此打算在女兒長大一點，即於每星期定一日作Family Day，好讓一家人齊齊參與戶外活動，玩吓跑吓，舒展身心，增進感情。
力求公平
一個人的想法，往往受童年經歷影響，說到管教女兒，Suki強調公平原則，務求令兩姊妹相親相愛。「當初馱妹妹嗰陣，已不時叫大女摸吓我個肚，令佢覺得自己與妹妹有身體接觸，日後對妹妹也會關心多啲，照顧多啲！事實上，本身也有個家姐，佢嘅性格得人鍾意，開朗又愛笑，而我就好『自閉』，唔識同人講嘢，成日唔開心、唔識笑，有時仲會諗埋一邊，例如見到家姐着靚衫，自己就要着佢啲舊衫，覺得好唔開心……所以，家陣見丈夫錫大女多啲，我都會唔開心……」
或許是身為孻女的Suki「太過敏感」，也可能是「感懷身世」，因此好希望兩個女兒獲得公平待遇，「我好公平，邊個有需要都會Take Care，唔會分彼此；丈夫覺得大女識得同自己溝通，有時可能錫大女多啲，忽略咗細女，見到咁嘅情況，我一定會提醒佢，妹妹都好需要人錫o架……」
賞罰分明
本着公平原則，Suki對兩名女兒都是賞罰分明。「朋友教我一個獎勵女兒嘅好方法，就係畀佢哋在玩具店揀自己喜歡嘅玩具，但原則是雙手能夠拎到幾多就幾多，佢哋自然會揀最鍾意嘅玩具，唔會樣樣都話要，唔識得去珍惜。除了賞，也有罰，有時Vianna唔乖，我會扮喊扮嬲，等女兒學識做錯了要Say Sorry；幸好我脾氣好，未試過被激到紮紮跳，通常一句Sorry，我就會抱番囡囡……」
說到尾，做媽咪的，無不希望孩子乖巧聽話，像Suki說：「只要囡囡心地善良，識待人處事，我就心滿意足了！」
Suki：因材施教最重要
做親子訪問，話題總會涉及子女的教育問題，雖然Suki的千金仍處於年幼階段，但她已有晒Planning。「我先生覺得，乜嘢都要畀囡囡試，等佢哋自己選擇；我就梗係希望囡囡學嘢能事半功倍，所以想幫大女做皮紋測試，睇吓佢喺邊方面嘅發展好啲。以目前情況來看，大女比較文靜，鍾意睇書，我睇乜書，佢又要拎嚟睇，而家幫佢報咗兩個Playgroup，一個以遊戲為主，一個就傳統啲，教弟子規等中國文化，兩邊比重差唔多。升學方面，本身想囡囡入本地學校多啲，國際學校唔係唔好，但擔心囡囡自由慣咗，日後要轉番本地學校就好難適應！」
撰文：梁穎恒
攝影：梁偉德
部分相片：由受訪者提供
模特兒：Bryan @ Sens Communications