HMZ-T1 3D Viewer 750吋巨幕戴起熱潮

最平可以點樣自建私人3D影院？答案是只需$6,000有找，便可將虛擬750吋的720p 3D「影院」帶返屋企。Sony最近將月前在日本推出的Personal 3D Viewer HMZ-T1頭戴式顯示器引入香港，用家只需接上3D影音器材即可享受到極清極流暢的立體影片，更可接收到甚有臨場感的虛擬5.1聲道音效，當阿媽霸住電視追「師奶劇」時，各位都可以自得其樂睇戲打機！

售價：$5,980

OLED既靚又有層次

Personal 3D Viewer產品分類屬於頭戴式顯示器（Head Mounted Display），早前Epson在日本推出的Moverio BT-100便屬同類產品，但它以流動用途為主，解像度較低且採用透光式設計；今次Sony改走家庭娛樂路線，需要另接訊號處理器再駁高清影音器材使用，顯示性能較高。最大賣點是在機內植入兩塊0.7吋高清OLED屏幕，唔似LCD要靠光管發光，顯示解像度亦達1,280×720高清質素，黑位可顯示出實黑，對比度又夠高。

雙屏幕流暢睇3D片

新機另一強項是採用「雙屏幕3D顯示系統」，要知道一般主動式快門3D電視或投影機，都要靠不停閃爍影像及開合眼鏡快門，從而組合出3D影像，容易睇到頭暈。而新設計改用兩個獨立屏幕，便可各自放映左眼及右眼影像，睇3D片就唔怕有殘影，小記試睇《哈利波特——死神的聖物》3D藍光碟預告片，其中一幕魁地奇追逐戰時，明顯發現流暢度及層次表現都比3D電視為佳。而且機身採用全包圍式設計，戴上後完全睇唔到外面，令用家睇片時更專注，而且45度水平觀賞角度亦較闊，可營造出750吋超大虛擬畫面，包圍感媲美IMAX影院！

提供5級眼距調校，適合不同用家需要。

佩戴時要靠頂部的軟墊支撐額頭定位。

虛擬5.1聲道具臨場感

要睇又靚又清的畫面，最重要係將HMZ-T1穩妥地戴在頭部，以額前的軟墊支撐定位，再靠背後的索帶固定，配合5級眼距可供調校，就算隔住眼鏡都能戴得舒服。On Ear式耳機亦一樣可前後及上下調校，適合不同用家需要。耳機的音效表現亦見水準，支援Sony虛擬5.1聲道環迴立體聲技術，能營造出從四周發聲的空間感，仲可以因應所睇的片種而選擇標準、影院、遊戲及音樂立體聲模式，實試效果比得上5.1聲道家庭影院！