Nissan March花心思冧愛侶

今日係聖誕節，送禮物畀另一半係指定動作，假如你仲未有頭緒買乜，女朋友又剛好考到車牌，索性帶佢去陳列室揀番部車，咁樣肯定冧爆啦！聽落好似好貴，但如果計埋日後可同Darling揸車周圍去玩，咁就乜都抵番晒，以車價$149,800的日產（Nissan）March為例，連同牌費（$4,012）、0% NCB保險（$10,909）都係$164,721，扣除10%首期再以3%利息上60個月車會，每個月都係供$2,841，一日都唔使$100！

售價：$149,800

最啱新牌仔

對「新牌仔」來說，揀車的主要考慮因素一定係易揸，馬力幾大、幾好彎並唔重要，今次介紹畀大家嘅March，唔單止車仔細細易睇位，錶板仲加入咗一個特別功能，屏幕可顯示輪胎轉向角度，毋須探頭車外都可得知輪胎方向，對於駕駛經驗淺的人士尤為有用，能減低撞及旁車的機會。March仔的車價唔高，但出車標準卻包含了一套支援USB輸入的音響系統，可接駁數碼音樂播放器，一插即聽，非常方便。同時，錶板中間的顯示屏，還可顯示重要紀念日的訊息，幾冇記性都唔怕忘記男朋友仔生日啦！

慳油好易養

香港養車成本唔低，當中的油費已佔了開支一大截，所以慳油小車愈來愈受用家歡迎，反正大馬力車唔啱新手，以慳油主打的March，確是「新牌仔」的好選擇。新March搭載的1.2公升直三CVTC引擎擁有79ps馬力，最大扭力則為10.8kgm，力量是剛好夠用那種，你不能要求它有很強的加速力，也不用擔心上斜唔夠力，作為代步車是綽綽有餘的，載着3名成年人開大冷氣上飛鵝山，力量依然充沛。廠方指，其平均油耗可低至24km/L，折合每km的燃油成本僅約$0.67，咁就唔使下下就住揸啦！

聖誕帶女友去揀車，呢鋪仲唔冧爆？

加$6,680便可改為皮椅，唔算貴。

全車用上不少圓形圖案，營造出可愛的觀感。

拉花作點綴

車仔的好處唔只慳油，就連睇位都易好多，新March的長、闊度為3.78×1.665米，可輕鬆地穿梭於橫街窄巷，加上迴旋半徑僅4.5米，窄路掉頭易如反掌。此外，擋風玻璃的面積比上一代大，使視野更為廣闊，轉彎時，左右兩邊視線不會被A柱大幅遮擋，即使個子較為矮小的女士，都不會出現難睇位的問題。車廂方面，空間跟車身有點不成正比，車身小巧，但內櫳卻出奇地大，後排乘客的頭、腳部空間媲美不少1.5公升私家車。現時，代理還提供霧燈、皮椅及車身拉花作選配，價錢由$1,880起。