官恩娜Love Story

相信每位少女都曾憧憬一段浪漫得有如電影情節的愛情，個性率真的Ella就坦言年少時拍拖，試過這種夢幻的浪漫感覺，也算是戀愛中最浪漫的回憶，Ella娓娓道來：「十幾廿歲時去泰國拍完廣告返香港，當時嘅男朋友嚟接我機，嗰時資訊冇咁發達，所以唔知我幾點機，結果佢等咗我成晚。依家諗起覺得佢好辛苦囉，但回想起又好浪漫好有電影感。」回憶的確是美好，所以Ella又補充說：「可以講係好有初戀無限touch嘅青春feel。」

撞破前度劈腿

有喜自然有悲，Ella自言亦曾受過愛情傷害，當被問到有沒有戀愛中最不愉快的經歷？Ella想了想，然後說：「實有啲呢種經歷嘅，試過捉到個男朋友唔見咗一個禮拜，之後出街撞到佢同另一個女仔坐埋同一架車，應該係話撞破佢同第二個女仔拍拖。我有當場識穿佢，咪問佢：『你喺度做緊咩呀？』咁其實大家知咩事啦，唔使講分手就拜拜。」雖然遇到這種情況，但Ella表示自己一定不會當場落淚，亦絕不是發爛渣擲東西的人，只會保持沉默，然後默默地為這段情畫上句號。Ella堅決地說：「我唔會鍾意一個唔鍾意我嘅人。」

Ella甜蜜透露現任男友喜歡她整個人，令她大為感動。	Ella當年與吳卓羲合作拍劇而傳出緋聞。	關楚耀（右）

男友眼中完美

面對如此果斷和爽朗的Ella，問其男友是否很欣賞她這種個性？Ella笑說：「佢話咩都鍾意喎，係我佢就鍾意。（男友咁識講嘢？）可能係真話呢！」Ella又甜絲絲地透露：「有時影完輯相畀佢揀一張最靚嘅，佢就話張張都好靚揀唔到，總之係我個樣就靚。雖然我自己都覺得有啲靚有啲冇咁靚，但當佢好專心咁睇完都覺得好難揀，我都好感動嘅，會覺得呢個人咁鍾意我嘅？好啦，就畀佢鍾意啦！」既然男友如此愛錫她，是否嫁得過？Ella卻說：「未諗住。（有冇plan？）呢啲唔係自己plan喎，等我得閒放假先啦，未來半年都會好忙。」的而且確，Ella早前忙於籌備新碟和11月中與關楚耀crossover的live音樂會，可謂是大忙人一名，難怪無暇諗終身大事。

官恩娜於與關楚耀crossover的live音樂會上自彈自唱，十分滿足。	自言男仔頭的Ella，最想嘗試拍古裝做女俠。	消防官及俏媽姐造型令官恩娜十分回味。

恨做古代俠女

入行已一段時間，問Ella最想嘗試甚麼工作？她想了一下說：「其實我算好好彩，咩範疇都接觸過，如果要揀，想再拍戲囉，我唔係做過好多角色，所以任何角色都有興趣。不過最想拍古裝，因為未正式拍過，但角色就唔好太嬌嗲，始終我性格唔係太過女性化。做俠女都好喎，有得打又有得着古裝，加上我都想試吓拍動作場面，又覺得自己handle到。」

俏媽姐造型	外形艷麗的Ella愛作簡單打扮。	曾經歷台灣地震的Ella，回想起來仍覺心慌慌。

服飾簡單為主

Ella外表艷麗，加上擁有鬼妹仔的熱情性格，令人以為她愛作性感打扮。但Ella平日穿衣會以簡單舒服為主，今季她更愛上顏色鮮艷的冷毛衣，她以冷毛衣配上大熱的紳士鞋，打扮起來帶有60年代的校園風格，青春洋溢，十分適合Ella活潑俏皮的可愛性格。

遇地震驚到震

談到入行後最驚險的經歷，Ella睜大眼說：「試過喺台灣一個茶莊拍緊嘢，點知遇到地震，真係好驚。（當時有冇諗起最重要嘅人？）冇呀，驚到咩都諗唔到。其實地震雖然只係歷時幾分鐘，但已經好嚴重，到咗嗰種情況根本諗唔到其他嘢。」

採訪：李惠儀

攝影：劉智源

髮型：Eve Chiu

服裝：KooKai