十全十美 為幸福起義

十個女孩九個希望嫁得好，於是「十月十日」變了熱門婚期，不少女孩子都趁這個「武昌起義」紀念日，為個人幸福「起義」，給獨身時代畫句號。眼見梁詠琪、莫文蔚、郭羨妮紛紛甜蜜出嫁，一眾單身貴族可有衝動步三人後塵？

話時話，要締結一段完美婚姻，除了要擇個良辰吉日，婚禮的鋪排也得盡善盡美，未有Idea？不妨看看四位圈中靚女對婚禮的期盼，靈感隨時一觸即發！

梁靖琪（Toby） ‧電視藝員 ‧開辦婚禮統籌公司，將於年底結婚	婚禮不一定要盛裝隆重，在沙灘舉行，跟陽光玩遊戲，感覺也不錯！	龔嘉欣（Katy） ‧電視藝員 ‧舞技精湛，曾習民族舞5年

梁靖琪：向陽光海灘說I Do

「要搞一個十全十美嘅婚禮，當然要先搵到一位十全十美嘅老公啦！婚禮場地方面，我會選擇去一個清靜嘅沙灘，因為本身好喜歡陽光與海灘，而且在藍天碧海下向另一半說I do，很浪漫呢！至於會否穿婚紗？我反而想Casual一點，配合番周圍環境嘛，另一半只需着一套白恤衫襯一條卡其褲就可以，最重要係大家都唔使着鞋，感覺Free啲，而到來見證嘅朋友亦可以好好享受吓陽光。」

放大圖片	斐濟的小島風情令人嚮往，能夠在島上小教堂舉行婚禮，定必令人難以忘懷！	羽翹（Ava） ‧新進女歌手 ‧港大校友，擁有八級鋼琴證書

試點推介：

在古堡舉行婚禮，猶如玩時光倒流，極具古典味道，最適合愛懷舊的男女。	楊洛婷（Rabee'a） ‧前港姐亞軍 ‧電視節目主持，通曉英語、法語	美國迪士尼世界是不少女孩子夢寐以求的結婚場地，一世人一次，梗係想夢幻吓啦！

不少婚禮統籌公司都有代辦海外婚禮服務，若想舉行沙灘婚禮，位於峇里島的Benoa海灘，是不錯的選擇，既有潔白的細沙，又充滿南洋風情。不想遠遊？康文署轄下的淺水灣也可以舉行婚禮，手續簡單，詳情可瀏覽www.lcsd.gov.hk/wedding/b5/rbb.php。

龔嘉欣：遊Fiji小島定終身

「我想好似Gigi一樣，能夠去一個外國小島舉行婚禮，感覺應該幾正！行禮嘅地方最好係一個以透明玻璃建成嘅禮堂，因為本身喜歡開揚。之前去過Fiji（斐濟群島），當地嘅自然景色真係好靚，海水又藍又綠，所以希望自己可以在當地小島跟另一半定終身，既可保持私隱，又可順道划艇潛水，邊結婚邊旅行。如果可以的話，我想所有愛錫我嘅朋友都可以去到現場觀禮，咁就最美滿！」

試點推介：

充滿熱帶風情的Fiji有超過300個島嶼，任你選一個作婚禮場地都得，又可舉行雨林婚禮，而且其婚禮形式別樹一格。詳情可參考www.fijime.cn/traditional/romance.html。

羽翹：做古堡主人晒浪漫

「很嚮往童話式婚禮，夠浪漫嘛，所以希望能夠在一座古堡內舉行婚禮，歐洲是首選地點，因為當地的古堡建築動輒幾百年歷史，好有特色！婚紗方面，我會選一襲黃色嘅婚紗，一來之前拍過唔少婚紗照，多數都係白色，已經好難令我驚喜，二來本身好喜歡《美女與野獸》呢齣動畫，對於女主角着住黃色婚紗行禮，印象好深刻，若然自己可以好似片中嘅女主角一樣，感覺一定好正。」

試點推介：

英國有不少古堡均對外開放，甚至可提供婚禮服務及住宿服務。詳情可參考www.hedinghamcastle.co.uk/。

楊洛婷：請米老鼠作見證

「細細個好鍾意睇卡通片，尤其是同王子公主有關嘅卡通，Cinderella嘅故事實在太吸引，所以現在對玻璃鞋特別有好感，但凡見到閃令令嘅鞋款都會忍不住買下來，一嘗扮公主嘅滋味；將來有機會與情人拉埋天窗，希望自己可以像Cinderella一樣，坐着南瓜車去城堡搞婚禮，當然另一半都要着到好似白馬王子一樣。如果能夠邀請埋一眾迪士尼角色為我嘅婚禮作見證，更加十全十美！」

試點推介：

Walt Disney World向來是熱門結婚場地，大家可選擇在Magic Kingdom或Animal Kingdom等不同王國舉行婚禮，除了可邀請米奇、美妮搞氣氛，亦可以南瓜車作新婚花車，新娘子甚至可以扮成Cinderella行禮！詳情可瀏覽http://disneyweddings.disney.go.com/connect/wedding-website。

撰文：梁穎恒