Cara G.擬創高峰收復失地
混血模特兒Cara G.在o靚模界打滾多年，事業發展經歷過高低潮，也曾想過放棄，面對o靚模「波濤胸湧」新勢力，更曾自我懷疑甚至想過隆胸，不過她終於想通，為她熱愛的模特兒工作繼續努力，而她最大夢想是成為一位演員。至於愛情方面，已認定男友Jesper是她的Mr. Right，隨時嫁得的她就只等男友開口求婚。
Ｃ：Cara G. 記：記者
記：做咗咁多年model有咩感覺？
Ｃ：I love it！我覺得做model係世界上最好嘅工作。我由2001年開始到依家已經做咗超過十年，其實當初係我婆婆想我做，佢好沉迷睇電視，覺得做model好靚又可以周圍去。我細個住喺澳洲一個小鎮，嗰度多數都係白人，我係有色人種好難被人接受，所以細個時根本冇諗過會畀人接受，可以成為model。我一直都想成為一個演員，我鍾意喺鏡頭面前表達自己，我等緊機會來臨。我有好多興趣，依家做主持同電視節目都好開心。喺香港遇過啲人，為咗成為演員，佢哋咩角色都做，咩戲都爭取演出，個心態係無論如何都非要做演員不可，我並唔係咁樣，我唔會刻意強求，當時機一到自然會發生。
保持專業 做好自己
記：做model咁耐有冇諗過放棄？
Ｃ：梗係有，成日都會諗，每當我覺得沮喪時就想放棄，做model收入唔穩定，當淡季時我就會想退出model界，又或者係重返校園讀書。當市道唔好時，我都試過覺得好驚、好冇安全感同埋抑鬱。呢個行業喺香港真係好奇怪，啲女仔可以突然之間變得好受歡迎，原因係佢哋大胸。我會開始質疑自己，我專業、勤力、對人友善又容易相處，原來都唔夠，唔通我要去隆胸？不過當然我只係失落時至會咁諗，唔係真係想去隆胸！保持我嘅專業，做好自己先係最重要。我記得喺2009年，有好多女仔出咗嚟，全部都係大胸又性感嘅，當時個經濟都好差，少咗好多job，嗰段時期係最難捱嘅，不過已經過咗去。我仍然熱愛模特兒呢份職業，最鍾意就係拍電視廣告。
記：o靚模喺工作上對你係咪一種威脅？
Ｃ：當然有啲工作係失去咗，如果行性感嘅話，o靚模會係一種威脅。喺其他國家根本唔會有呢啲情況發生，我之前都會有啲驚。但其實大家形象同路線唔同，市場都唔同，我亦唔介意行內衣騷或者泳衣騷。有啲o靚模都發展得好好，好似周秀娜，唔係一味性感。
記：之前你去英國發展咗模特兒事業三個月，點解唔留耐啲繼續發展？
Ｃ：我唔想重新嚟過，我今年已經27歲，過多兩、三年後我就30歲，冇人可以保證我會發展理想。同埋Jesper曾經為我放棄追求自己嘅夢想，陪我一起留喺香港發展，我唔可以咁自私，要佢為我犧牲多一次，要佢陪我去英國由頭開始過。而且我屋企喺澳洲，香港過去只係幾個鐘飛機，但倫敦同澳洲距離實在太遠喇，一日一夜都未返到去。
利用身份 積極行善
記：有冇諗過去荷里活發展？
Ｃ：Jesper話我應該去荷里活試吓，不過我暫時只係想專注目前嘅工作，喺香港都有好多機會，同埋我想學好國語先。
記：工作上有咩目標？
Ｃ：上年我主力將時間都放咗喺國際市場上，好似做Channel V同National Geographic嘅主持、演出美國真人騷電視節目，仲有去英國做modelling工作，所以好少留喺香港。嚟緊我想重建自己喺香港嘅事業，希望有機會參與電影演出。我會畀自己最少五年時間留喺香港發展，我目標係想成為top model、主持同埋演員。當然，我都會繼續參與慈善工作，希望藉住celebrity model嘅身份去影響更多人行善。
七年之癢 不易放棄
記：同男友打算幾時結婚？
Ｃ：我都唔知自己會幾時結婚，要維繫一段關係並唔容易，一定會有開心同唔開心。我覺得最難係去keep住嗰份激情，要有啲小情趣，例如一齊去吓旅行，又或者着啲性感內衣畀佢睇。現今嘅人太輕易就放棄一段關係，我希望我可以過渡到一啲唔開心嘅低潮期，唔會咁輕易就放棄。我哋永遠都唔可能去改變一個人，愛佢就要接受佢而唔係改變佢。
記：你哋拍咗拖快七年，驚七年之癢？
Ｃ：有係正常，我都痕過幾次，都曾經有掙扎過，不過最後梗係冇事發生啦。我好珍惜同Jesper嘅感情，佢係一個心地善良同細心嘅人，係我嘅Mr. Right，我隨時都ready嫁畀佢，不過佢仲未求婚。
翻版鍾楚紅人氣急升
Cara剛來港發展時曾被冠以「翻版鍾楚紅」的美譽，以甜美樣子加火辣身材見稱。她在港首個以代言人身份演出的廣告更全裸上陣，大膽程度令人嘩然。由於當時她是接張栢芝棒出任代言人，因而被指搶了栢芝飯碗，人氣急升。而Cara向來肯搏肯捱，即使出了名依然肯接內衣及泳衣騷，從不會扭計揀job，十分專業。
愛心爆棚泰北當義工
Cara向來充滿愛心，經常做義工到偏遠落後地區探訪，早年她就曾經放下模特兒工作，隻身到泰北擔任義工個多月，在當地充當老師教導和照顧一班小朋友。她亦計劃將來結婚一定會生BB，她說：「我好鍾意小朋友，想生BB，但都會考慮領養，可能又生又領養，我以前想要十個小朋友，不過依家可能要兩個，都要視乎經濟能力。」
about Cara G.
血統：中國、泰國、瑞士及愛爾蘭混血兒
身高：172cm
體重：50kg
三圍：33、23、35
採訪：張嘉敏
攝影：沈健程
場地：蘭桂坊Indochine