東京遊戲展直擊 獵人搶打N3DS芒亨

Capcom N3DS「芒亨」有Wii水準

今年Capcom的試玩場布置得勁靚，如《Monster Hunter 3（Tri）G》的丹基亞港、《Dragon's Dogma》的巨型飛龍裝飾、《Street Fighter × Tekken》的浮世繪式試玩台，以至《戰國Basara 3 宴》的日式榻榻米加浴衣Game Girls，都極之吸引！

但最多人排隊試玩的始終係N3DS「芒亨」，系統沿用Wii家用機設計，但操控就有點《MHP 3rd》感覺，不過由於N3DS備有上下畫面，玩家可透過輕觸畫面轉視點或以Analog掣操作，手感都算唔錯。現場還提供初、中及上3個難度關卡，以4人一組出戰，上級正是挑戰今集Boss「布拉奇迪沃斯」龍，雖然幾難打，但流暢度不俗，3D景深亦有水準，推出後應能刺激N3DS銷情。

《Monster Hunter 3（Tri）G》試玩版分為初、中、上級。	Capcom將「芒亨」試玩區布置成丹基亞港。	可買Show Girl手上的右Analog掣模組，亦可以篤芒轉視點。

同場推介：奇幻動作遊戲

除「芒亨」外，《Dragon's Dogma》同《阿修羅之怒》這兩款遊戲都有睇頭，前者係Capcom第一款以Open World形式設計的動作遊戲，以中世紀為舞台，大家可以想像成一隻魔戒版「芒亨」。至於《阿修羅之怒》係一隻走奇幻風格的動作遊戲，講主角阿修羅被打落凡間，大開殺戒挑戰巨型Boss，又爽快又有玩味。

《Street Fighter × Tekken》展館以浮世繪風格設計。	Game Girls現場Snapshot	放大圖片

SEGA《Binary Domain》轉打射擊

估唔到SEGA今年會繼續食《人中之龍》老本，換上新角色後的第二彈《黑豹２人中之龍 阿修羅篇》，仍以4人協力方式進行，並在大阪蒼天崛登場，玩法跟舊作接近。不過現場亦給玩家不少新鮮感，如以2080年日本為舞台的第三身射擊遊戲《Binary Domain》，試玩版的畫質和動作流暢度都唔錯。

放大圖片	《Binary Domain》宣傳板下設有3間玻璃房試打。（2012年2月推出）	現場可試到《機動戰士Gundam Extreme VS.》連線玩法。（12月1日推出）

Namco Bandai Gundam聖鬥士打孖上

Namco Bandai Games主力遊戲有《機動戰士Gundam Extreme VS.》跟《聖鬥士星矢戰記》，前者改編自同名街機遊戲，以2對2打法對決；至於《聖鬥士星矢戰記》以漫畫版的聖域十二宮篇為主題，可發動黃金聖鬥士施展各種絕技，現場試玩畫面表現到位，應可滿足Fans要求。

《二之國：白色聖灰的女王》唔止吸引女玩家，男玩家一樣受落。	《Forza Motorsport 4》支援Kinect操控，凌空駕駛吸引不少玩家。（10月推出）	今年首度參展的GREE，備有大量Smartphone遊戲試玩。

SCE《二之國》似宮崎駿動畫

SCE今年將全力放在PS Vita身上，真正自己開發的PS3新作並唔多，當中經由Level-5推出的《二之國：白色聖灰的女王》成為當中主力。遊戲為一套奇幻的冒險RPG，由久石讓做音樂部分，一開機就好似睇緊宮崎駿動畫一樣，Fans們無得唔玩。

Microsoft Forza揸無影車

Microsoft今年的攤位規模較細，Kinect試玩台只得3個，但就輪流Show新遊戲，如《Forza Motorsport 4》、《Dance Central 2》同《Kinect Sports : Season 2》的人氣都唔錯。至於場外更有製作人示範Kinect專屬遊戲《重鐵騎》，只需一個手勢動作就能控制坦克進攻，更加入不少互動功能，值得期待。

Smartphone遊戲抬頭

今年TGS特意在當眼位置加入Smartphone遊戲專區，內有手機服務商GREE及各手機公司，令今年展出的Smartphone遊戲由去年的50款增至98款。日本公司在開發Casual Game頗具實力，照睇今後Smartphone遊戲可穩佔TGS展覽一席。

特派記者：布偉倫　鳴謝：SCEH