天氣唔多穩定，一時落雨一時又出猛太陽，但躲在家中又怕悶？咁就可以玩吓這隻正進行公測的《晴空物語Online》。有別於一般網絡遊戲，新作主攻宅男宅女市場，人物設定有咁萌得咁萌，貓耳、大眼等樣樣齊，加上可化身成上古仙獸，可愛又有型，同女朋友打機消暑最啱！
別以為角色咁萌就唔識打，不同種族玩家能化身成為不同的上古仙獸，造型可愛，能施展強大的仙獸之力，即使被怪獸圍攻都唔怕。但變身會消耗SP值，當SP值變成零便會解除化身。另外，仙獸之力還擁有「部位破壞」能力，可在大怪物身上找出弱點，持續攻擊那弱點便能造成強大打擊，更會增加跌出珍貴道具的機會。
遊戲內分成麒麟族、玄獅族、月狐族3個種族，共有6種職業，造型當然各有各「萌」。而操作亦比較簡單，並設有任務嚮導。最特別是玩家可以四出「示愛」，全因遊戲設有情侶系統，玩家的服裝能使用染劑自行染成喜愛的顏色，扮靚後出擊，示愛自然更易成功；而且向對象示愛成功後，更可一同使用情侶絕技，玩落都幾過癮。
類型：MMORPG
代理：Alta Multimedia Ltd.
推出日期：現正公測
售價：免費
網址：http://gd.alta.hk/
撰文：李潤康
查詢電話：2763 8200