橋咀島潛水賞珊瑚透心涼

夏日炎炎，去海灘游水固然消暑，但如想進一步感受水底的奇幻世界，潛水才是最佳選擇，香港有不少團體提供潛水課程，小記早前便與兩位模特兒，參加了潛水快線的體驗水肺潛水課程，去橋咀島水域玩咗半日，背着氣樽、戴上潛水鏡、着上蛙鞋，落水即時感到透心涼，一望水底，魚仔、珊瑚盡入眼簾，令人一玩上癮。

體驗水肺潛水

去到布吉、馬爾代夫、大堡礁等地，總會見到人戴住「金魚缸」在水底漫步，或者戴着呼吸管、氧氣樽等裝備潛落水底，其實這些都泛指為潛水，而今次所玩的水肺潛水，即是攜帶水下呼吸系統進行的潛水活動。小記開頭都以為這運動一定很難學，後來發覺只要按部就班體驗學習，是一項又安全又消暑的夏日玩意！

放大圖片

一天即學即玩

今次參加的體驗水肺潛水課程，$650已包括一天出海的船費、教練費、證書，以及使用一支氣樽及潛水裝備，教練在出發往橋咀島的船程時，會詳細介紹水肺潛水的裝備及使用方法，例如氣樽、浮量控制器、呼吸調節器等，學員在船上熟習了使用方法便可下水。模特兒起初都擔心泳術唔夠好，後來玩落才發覺跟足教練指示，水肺潛水都唔係太難。

進階水域訓練

落水時只要將浮量控制器充氣，便能輕鬆地浮在水面，跟着慢慢放氣便會自動潛入水中，享受潛水樂趣。當然只有半日的體驗水肺潛水課程只是起步，如想真正認識潛水，可選擇內容更全面的PADI開放水域潛水員課程（費用為$3,480），包括5堂課堂理論、5堂泳池或控制水域技巧練習、2天4次開放水域下潛練習等，畢業後便能初步掌握潛水技術，在香港睇珊瑚和小丑魚都難唔倒你。