動漫節率先試 Kinect光劍互劈
動漫電玩節明天（8月2日）就結束，仲未入場的話要好好把握機會啦！皆因Xbox在動漫電玩節大搞攤位，除咗有一系列優惠外，仲Show Off唔少下半年推出的Kinect體感遊戲，而最能俘虜一眾動漫迷非《Kinect Star Wars》莫屬；《Dance Central 2》則有美少女加在台上熱舞，令現場人氣爆燈！
《Kinect Star Wars》新增峽谷賽艇
《Star Wars》遊戲真係出過唔少，但冇乜邊隻可以畀大家體驗到原力和光劍的真實感。今次《Kinect Star Wars》就真係做到晒，玩家可用體感方式以原力隔空取物，伸手向前一推便可閃身前進，仲可以扮揸住光劍同人互劈，今次試玩版正式登陸香港動漫電玩節，齋睇已覺得興奮。
擺得上動漫節大台當然唔會得咁少嘢，《Kinect Star Wars》新試玩版加入峽谷賽「艇」，以體感方式控制太空船，在多彎和充滿陷阱的峽谷鬥快，玩落認真刺激，而且更具電影感！雖然官方話遊戲年底前推出，但現場宣傳牌已用上「十一月會同大家見面」語句，同場更展出美國Comic-Con公布的Star Wars限量版Xbox 360主機連Kinect套裝，配上金手掣型到震！
《Dance Central 2》喪跳100首歌
記得舊年動漫電玩節Xbox搵來周秀娜同Jessica C.大跳《Dance Central》，今年以續集《Dance Central 2》吸引玩家。雖然玩法同上集分別不大，要用全身體感方式跟Step跳舞，但新作對應雙人齊齊玩，可以隨時加入或退出，舞癮大發時加入都好方便；加上遊戲收錄歌曲有40首，到推出後仲可以匯入埋上集歌曲，一次過喪跳100首之多，可說是Party必玩之作。
《The Gunstringer》西部扯線公仔
《The Gunstringer》唔算係大作，但現場玩落都幾過癮，玩家要用左手控制扯線公仔動作，然後用右手射擊，操作同其他射擊遊戲有啲唔同，頗具西部牛仔風格，驟眼睇幾似之前上映的動畫《馬拉高》，都有一玩價值。
《Fruit Ninja Kinect》雙手劈生果
好多人都玩過iPhone版《Fruit Ninja》，而Kinect版唔只用手指切生果咁簡單，而係要用雙手劈，體力要求高好多o架！新作收錄了Classic、Zen同Arcade模式，仲加入Party同Challenge模式玩雙人互劈，800 MS Points下載費用，抵玩！
撰文、部分攝影：布偉倫
查詢電話：3071 4868