柏林圍牆倒塌22年了，我卻是18年來首次回到柏林，多年不見，物換星移，耳目一新，我惟有當作第一次到訪──也好，人生難得有回復「處子之身」的機會。
常聽說，柏林的Night Life好正，不蒲太浪費。講到蒲，18年前我不敢，又驚又冇錢，仲唔夠靚，何必獻世呢？18年後我不想，又怕嘈又捱不住眼睏，而且都冇靚過。結果，蒲的歲月跟我擦身而過，如今每夜只曉得留在家中或坐在咖啡室寫稿……此時同行老外L打斷我的思路：「你知道嗎？柏林蒲吧跟香港蒲吧是兩回事。」
香港或美國最時尚的夜店，若不是「閒人免進」的Private Club，就是又昂貴又扮高貴的時尚格局，只歡迎本身很靚或穿得很靚的都會男女；柏林最人氣的夜店剛好相反，往往不求裝修不拘小節亦毫不扮嘢，毋須計較Dress Code都可進入。另一老外朋友E說：「所以有些美國人穿金戴銀豪裝戰鬥格來到，會好失望，露出一副『點解係呢啲咁嘅地方』的嘴臉。」聽後，我立即舉腳加入，跟大隊出發。
結果來到Gipsstrasse一間叫Altes Europa的酒吧兼咖啡室，像舊日的小酒館，殘破中帶靡爛，好有Feel；瞄瞄身邊客人，左邊是一群型格西裝精緻長裙像末代貴族的靚人，右方是一堆衣着隨便帶Nerdy氣味的中年男人，前面有一對攜同樂器而來的小情侶，後面有一位靜靜看書和沉思的孤獨精。這種兼容量十足的大同世界夜店，我最喜歡。柏林真酷。
旅遊飲食寫作人