各位有冇玩過10年前推出的PC遊戲《Alice》？當年以《愛麗絲夢遊仙境》故事為骨幹，加入大量黑色元素，已擺明唔係糖衣包裝的Casual Game。續集《Alice: Madness Returns》10年後推出，遊戲再走偏鋒，講愛麗絲離開精神病院後，再入仙境尋找家人的死亡原因，唔止愛麗絲癲咗，解謎方法仲癲，要諗盡計仔至可以打低撲克牌士兵，玩落有難度，我Buy！
點解《Alice》要到10年後至出續集？廠方冇解釋到，或多或少跟添布頓的3D電影《愛麗絲夢遊仙境》有關，令大家重新對「愛麗絲」感到興趣。新作承接上集故事，講愛麗絲全家人被火燒死，愛麗絲更因此癲咗，被關進精神病院；出院後再由現實中的倫敦，深入陰沉詭異的「仙境」查明滅門原因。話晒相隔10年，所以廠方特別做多一個復刻PC版，如果玩家預訂《Alice: Madness Returns》，即可收到下載碼，到EA網上商店免費下載第一集重溫，真係設想周到！
遊戲玩法雖然同一般冒險遊戲相似，一邊打敵人一邊搵路解謎，但係《Alice: Madness Returns》加入原著故事的設計下，變得頗有趣味，而且版圖造得更靚，幾有添布頓Feel。當中6個場景都各有風格，所隱藏的謎題亦各自不同，需要小心檢查每個細微線索，好似有一版打低頭目後，依然搵唔到出口，這時要像原著般縮細身體，找出之前忽略的細節，只要搵到豬頭公仔，用胡椒樽射爆佢就會顯示出路啦！
《Alice: Madness Returns》用到的武器都好夢幻，好似剛提到的胡椒樽機關槍外，茶壺亦能變榴彈發射器，發條兔仔可當成遙控炸彈，對付較強敵人相當有用。另一種新設計的防衞武器係雨遮，雖然本身唔可以拎住把遮周圍篤敵人，但只要夾到時間開遮，就可反彈敵兵射出來的炸彈和物件。小記試過最佳招式是用兔仔炸彈埋伏，再加胡椒樽遠距離攻擊，若想成效更好，可繞到敵人背後用Vorpal菜刀亂劈，總之對付唔同敵兵要用唔同策略。
類型：冒險
開發：Spicy Horse、EA
平台：Xbox 360、PS3
推出日期：6月14日
售價：待定
查詢電話：3166 6001
撰文：布偉倫