黎堅惠掌握脈搏尖子攻略

提起黎堅惠這名字，大家總會聯想起一篇篇的潮物專欄、介紹各式事物的blog、甚至以「豪、新、潮」為賣點的電視節目。Winifred似乎與「潮流」有着密不可分的關係，被喻為「潮人」的她，笑言對此稱呼並無特別感覺：「只係人哋覺得我係啫，潮流係好多人喺度做緊，無可避免會見到，好多人講、好hit就為之潮流。我會叫自己做trend setter，係走在潮流前，喺嗰樣嘢未匯聚成河之前嘅，所以係冇可能預先知道。」

不安現狀

為何Winifred會得天獨厚，有帶動潮流的能力呢？原來一切源於她的不安現狀、勇於創新探索的精神：「我好奇心好強，成日追求新鮮感。就好似睇衫睇開某幾個牌子，隔一排就會去睇其他牌子；食開某啲食物，就會去試其他新食物；過去二十年成日都去歐、美、日本旅行，依家就想去南美、印度、尼泊爾等等。」

她謙虛地說並無刻意創造潮流，只單純地挑戰自己未做過的事，然後將自己的感受跟大家分享，得到大家的支持及欣賞，是她始料不及的。

放大圖片	黎堅惠的新作推出，得到好友甘國亮（右）及卓韻芝撐場（左）。

毋須外求

這位「潮流達人」會去哪裏搜購潮流服飾？原來正正就是香港這彈丸之地，不用外求！Winifred說：「我係個購物狂，以前成日去巴黎、日本入貨，但呢廿年香港嘅零售業發展蓬勃，無論係冷門定大路貨都有，仲可以慳番搭飛機嘅錢添！」她認為香港享有免稅購物的優勢，近年吸引大量內地遊客來港消費，因而令不少國際著名品牌都來港開設旗艦店，作為進攻亞洲市場的第一炮！

身為時裝達人，Winifred在不同場合示範潮着配搭。

放大圖片

香港精神

Winifred說：「係人都知香港係名牌天堂，啲舖頭開到好夜、服務態度又好，成為其他城市嘅模仿對象。另外，仲有個特色，就係成街都係水貨，全世界淨係得香港先係咁，呢啲咁捉得緊城市脈搏、腦筋轉數快、勤力又識走位嘅行為，咪就係我哋嘅『香港精神』！」

南美心靈體驗 主持自我挑戰

在公在私，Winifred都同樣抱着與時並進、好學不倦的「香港精神」，由早期的雜誌編輯工作，到進軍唱片、廣告、電台、網絡世界等電子媒體，更成為城中知名blogger，擅於寫作的她，早前推出其新作《天空之鏡》，與讀者分享她南美心靈之旅的體驗，她說：「喺咁多樣嘢裏面，我最鍾意寫書，可以一個人控制到。但我都好鍾意同其他人合作，可以做到自己做唔到嘅事。」

近日，Winifred更跳入電視台，挑戰潮流資訊節目主持一職，笑言每項工作都充滿挑戰性，透過不斷的接觸、嘗試與學習，令人生變得更豐盛！「就算一個人喺某方面好好，都應該要繼續挑戰自己，做其他方面嘅嘢。呢個世界冇嘢話做唔到，一開始可能唔適應，做做吓就會上手，而且我覺得接觸新事物，可以幫人保持青春，起碼個腦唔會變鈍，哈哈！」她說。

ICC捐窿捐罅

Winifred被全港最高建築物環球貿易廣場（ICC）內全球第四高觀景台「天際100」，挑選為購物主題之旅的顧問，向遊客推介香港的購物熱點，教大家捐窿捐罅搵心頭好！

她說：「呢度唔單止可以360度環迴睇晒香港全景，仲有訪客中心同行程編排裝置，只要遊客輸入想去嘅地方，就會自動幫你編排好行程，仲會send埋去你e-mail，真係好方便！如果我去外國旅行都有呢啲設備就好啦！」

網購熱 網店掂

看準網上購物的熱潮，Winifred開設自己的網店winifredshop.com，早前她更與倫敦手製皮具商合作，推出Winifred x Jas M.B.系列，並於網上發售，獲得空前成功，為她打下一支強心針：「我一直都係抱住一個心態：得就繼續唔得就做其他嘢，但係成績好到令人好意外！」據知此系列手袋被私下熱烈搶購，今只剩小量公開發售，各位「潮人」入貨要快手了。

採訪：龔凱欣

攝影：謝國華

場地：天際100