火紅Volvo S60裝身眾樂樂

聖誕節，四周都充滿玩樂氣氛。去睇燈飾、派對或人多地方湊熱鬧，都可以感受一下呢個普天同慶嘅日子。但係出發前，你自己裝身好未呢？如果你決定駕車出外遊玩，咁最好當然係人同車都裝扮一番，搞搞聖誕氣氛啦！

綵帶滿車廂夠氣氛

無論係開派對、BBQ或睇燈飾，唔理你出街係乜目的，總之聖誕最緊要開心。出到尖沙咀海濱一帶時，必定見到人山人海，男女老幼都戴住聖誕飾物，手持螢光棒，聖誕氣氛滿瀉。若果你今日駕車出外，豈能不替愛驅打扮一下，人車都紅當當應吓節日氣氛。這輛紅色Volvo S60 2.0T就絕對應節，走入車廂將綵帶隨處掛，更能營造出濃厚的聖誕感覺，如果你係「單身」出擊，話唔定會有意外收穫，識到新朋友呢！

三五知己　假日遊

這款S60 2.0T，感覺十分年輕化，動力方面，配上一台2公升引擎，最大馬力輸出達203hp，扭力有300Nm，傳動則屬六前速Powershift雙離合器波箱，廠方公布加速數據顯示，0~100km/h加速只需要7.9秒，極速更可達235km/h，綜合耗油量為8.3L/100km，即約為$1.3走一公里，耗油量算理想。趁假日四出遊車河，五座位車更可以招呼埋朋友一齊兜風，所謂獨樂樂不如眾樂樂嘛！

S60 2.0T性能強又型格，適合年輕人口味。

尾箱容量達380L，載派對用品或禮物好夠用。

遊玩勿忘形緊守法

雖然話心情興奮同充滿Holiday Mood，但係駕車出外遊玩都有好多事項要留意，呢段期間可供睇燈飾嘅地區都係人多車多，出外前最好先查詢交通情況或封路措施；為求玩得開心同遵守法律，飲酒後千萬不要駕車，甚至乎係布置愛驅嘅時候都要留意，車內車外飾物裝置，全部都受道路交通條例所管制，布置汽車時，大前提係唔可以影響自己同其他道路使用者安全，咁大家就可以齊齊開心啦！

桶形跑化座椅，乘坐感舒適。	雙尾喉設計，帶點跑味。	聖誕襪掛車廂，話唔定吸引到聖誕老人呢！
如果係同女朋友去玩，當然要準備定一份禮物，氹佢開心啦！	三幅式軚環加上簡約的中控台，美觀又實用。	布置車廂要留意，飾物不要阻礙司機視線。