DMR-BW880高清錄影自製Blu-ray天碟

首玩Blu-ray錄影機

相比起一般硬碟錄影機，Blu-ray錄影機明顯流動性較大，燒錄完拎去朋友屋企睇片夠方便。一片Blu-ray碟可錄到35小時HM模式高清影片，想錄晒成套30集連續劇都有位剩；而且只要將AVCHD高清攝錄機駁上DMR-BW880，一樣可將影片燒到Blu-ray碟上。

DMR-BW880還加入兩組數碼廣播調諧器，方便同時錄影兩條不同數碼頻道，唔怕同屋企人爭睇電視。播片質素方面，內置「PHL基準色度處理器Plus」，可原汁原味重現電視畫質；另亦支援Dolby Digital Plus、Dolby TrueHD及DTS-HD MA高清音效解碼，聲畫都有好表現。

機面備有SD卡槽、USB端子，方便接上其他儲存媒體。

內置500GB硬碟可儲存到80小時最高品質DR影片，錄影介面簡潔。

42吋Plasma 追加2D轉3D

同期推出的42吋3D Plasma iDTV TH-P42GT20H，最大賣點是加入2D轉3D功能，雖然將2D電視畫面如新聞或劇集轉為3D的實際用途不大，但至少貪得意想睇「3D電視」都有新方法。發布會上Panasonic更將TH-P42GT20H跟其他廠的3D LED TV比較，可見Plasma顯示3D時無論色彩跟層次感都較佳，動態對比度達5,000,000:1，黑位簡直贏晒。

利用遙控器便可設定預校錄影及選台等設定，操控夠方便。	VIERA TH-P42GT20H售價：$22,980	跟VIERA高清電視相同，內置HDMI、SD、USB等插頭。

此外，新機還搭載600Hz Sub-field驅動系統及智能畫面創造功能，有效減低殘影現象，對採用眼球分離式設計的3D電視就更有用。其他配套亦做得唔錯，對應VIERA CAST網絡功能，可瀏覽YouTube影片或Picasa相片，亦能玩Skype視像通話。

首度加入2D轉3D功能，可將畫面「升級」至3D顯示。

放大圖片

試片區

試播街上尚未有得賣的3D版《Avatar》影碟，無論畫質和黑位都相當理想，3D感「凸」晒出來。

撰文：布偉倫　攝影：郭凱敏　查詢電話：2833 0955